Արեգակի խավարումը կարող է անդառնալիորեն վնասել տեսողությունը. տղամարդը զգուշացրել է վտանգի մասին

12 օգոստոսի, 2026 13:31

Թոնթոնի բնակիչ Փիթեր Սմիթը կոչ է արել մարդկանց օգոստոսի 12-ին արեգակի խավարումը դիտելիս օգտագործել պաշտպանիչ միջոցներ։

27 տարի առաջ Սմիթը արեգակի խավարումը դիտել է ինքնաշեն պաշտպանիչ միջոցներով՝ կրելով փոխառված եռակցման դիմակ՝ հավատալով, որ այն կպաշտպանի իր աչքերը արևի ճառագայթներից։

Սակայն հաջորդ առավոտյան նա նկատել է աչքերի առջև առկայծումներ և գլխացավ է ունեցել։ Հետագայում պարզվել է, որ երկու աչքերի ցանցաթաղանթը վնասվել է։ Սմիթն այժմ կոչ է անում բոլորին օգտագործել համապատասխան պաշտպանիչ միջոցներ՝ խավարումը անվտանգ դիտելու համար։

«Համոզվեք, որ պաշտպանությունը համապատասխան է և ունի ճիշտ ֆիլտրեր՝ վնասը կանխելու համար։ Որովհետև երբ դուք այդպիսի վնասվածք եք ստանում, այն երբեք չի լավանա։ Դա ձեր ձեռքի վրա կտրվածքի նման չէ», - ասել է նա։ Սմիթի խոսքով՝ նա դեռևս զգում է խավարմանը ուղիղ նայելու հետևանքները։

«Նույնիսկ հիմա հետևանքներ կան։ Երբ հոգնում եմ, երբեմն աչքերիս առջև կրկին թարթող բիծ է հայտնվում, և դա տհաճ է։

Եթե պլանավորում եք դիտել խավարումը, համոզվեք, որ ունեք անհրաժեշտ ամեն ինչ», - զգուշացրել է նա։

Թաղանթի վնասումը կարող է անդառնալի լինել

Թոնտոնից ակնաբույժ Սառա Ֆարանտը նույնպես զգուշացրել է, որ խավարումը առանց պաշտպանության դիտելը կարող է վնասել ցանցաթաղանթը և դեղին բիծը՝ ցանցաթաղանթի կենտրոնական հատվածը, որը պատասխանատու է ամենասուր տեսողության համար։

«Մեծ Բրիտանիայում մասնակի խավարումը կարող է մարդկանց մոտ ցանկություն առաջացնել նայելու արևին։ Բայց նույնիսկ երբ այն այստեղ ամենամռայլն է, դրա լույսը բավարար է վնաս պատճառելու համար։

Արևին առանց պատշաճ պաշտպանության նայելը կարող է առաջացնել այսպես կոչված «արևայրուք» աչքի հետևի մասում։ Սա կարող է հանգեցնել կենտրոնական տեսողության վրա երկարատև հետևանքների», - բացատրել է Ֆարանտը։

Ինչպես անվտանգ դիտել արևի խավարումը

Խավարումը դիտարկելու ամենաապահով ձևը ISO 12312-2 անվտանգության ստանդարտին համապատասխանող հավաստագրված արևի խավարման ակնոցներ օգտագործելն է կամ այն անուղղակիորեն դիտարկելը։ Մի՛ նայեք ուղիղ Արեգակին անզեն աչքով, սովորական արևային ակնոցներով կամ չպաշտպանված տեսախցիկներով, հեռադիտակներով կամ աստղադիտակներով։ Սա կարող է լուրջ վնաս հասցնել աչքերին։

12:48 PMhas context menu