Շոտլանդացի 17-ամյա Ջենիֆեր Ռադիգանն արդեն հինգ տարի է, ինչ միայն տապակած կարտոֆիլ ու պանիր է ուտում: Ցանկացած այլ տեսակի սնունդը (նույնիսկ բանջարեղենն ու միսը) վախեցնում է նրան եւ անհաղթահարելի սրտխառնոցի զգացում առաջացնում: Այս հինգ տարիների ընթացքում նրան միայն մի քանի անգամ է հաջողվել մի քիչ եփած կարտոֆիլ կամ մակարոն ուտել:
Ջենիֆերն սկսել է հրաժարվել սննդից դեռ մանուկ հասակում: Ամաչելով սննդի հանդեպ իր վախից՝ նա դպրոցում ոչինչ չի կերել, իսկ երեկոյան խաբել է ծնողներին, թե իբր ճաշել է եւ էլ քաղցած չէ: Այսօր արդեն աղջիկը միայն կարտոֆիլի չիպսեր ու պանիր է ուտում, որոնք, նրա խոսքով, միակ բանն են, որոնցից չի վախենում, եւ սիրտը չի խառնում:
Օրգանիզմը չի ստանում սննդանյութերի անհրաժեշտ քանակությունը, ուստի աղջիկն ամեն օր իրեն թույլ եւ էներգիայից զրկված է զգում, իսկ երբեմն էլ կորցնում է գիտակցությունը: 152 սմ հասակի հետ նրա քաշը մոտ 42 կգ է (մարմնի զանգվածի ցուցիչը 18.4 է), որը նորմայից պակաս է: Ի լրումն դրա, նրա օրգանիզմում երկաթի եւ B12 վիտամինի զգալի պակաս կա:
Մասնագետները ենթադրում են, որ աղջկա մոտ սննդային վարքագծի խանգարման հատուկ տեսակ է, եւ հենց այդ կերպ կարելի է բացատրել սննդի հանդեպ նրա վախը: Աղջիկը հիմա մասնագետների օգնության հոտ մեծ հույս է կապում: Չէ՞ որ նա շուտով ստիպված կլինի գնալ համալսարանում սովորելու, եւ այնտեղ՝ տնից հեռու, առանց պրոֆեսիոնալ օգնության նրա համար, ամենայն հավանականությամբ, ավելի վատ կլինի:
Հետևեք NEWS.am Medicine-ին Facebook-ում և Twitter-ում