Միջազգային փորձագետների խոսքով՝ հայերը չարաշահում են ֆասթ-ֆուդը եւ, առհասարակ, մեր սննդակարգը առողջ չէ: Ի՞նչը կարելի է ֆասթ-ֆուդ համարել իսկ ինչը` ոչ: Եվ համարվու՞մ է արդյոք հայերի կողմից այդքան սիրված քաբաբը վնասակար ծնունդ:
Դիետոլոգ-էնդոկրինոլոգ Հասմիկ Աբովյանի կարծիքով՝ քաբաբը շատ պայմանականորեն է դասվում ֆասթ-ֆուդի շարքին, եւ այդքան վնասակար չէ, որքան մի շարք այլ ուտեստներ:
Եթե քաբաբը պատրաստված է ոչ յուղալի մսից կրակի վրա, այլ ոչ թե պարզապես տապակած է, եւ եթե այն չեն ուտում հացի հետ, ապա քաբաբը կարելի է բավականին առողջ սնունդ համարել:
Ո՞ր ուտեստներն են ֆասթ-ֆուդ համարվում եւ քաբաբից վնասակար են
Դիետոլոգի կարծիքով՝ ֆասթ-ֆուդի շարքին են միանշանակ դասվում տարբեր բուտերբրոդները, սպիտակ հացի եւ յուղալի մսի բոլոր համադրումները, լահմաջոն եւ նույնիսկ պիցցան: Այո, պիցցան նույնպես ֆասթ-ֆուդ է համարվում, եւ այն այդքան օգտակար չէ, որքան կարելի է կարծել, մանավանդ եթե պարունակում է նրբերշիկ, երշիկ, տարբեր տեսակի ապխտած միս, որոնք չափազանց վնասակար են: Բացի այդ՝ պիցցայի մեջ պարունակվող տարբեր կոնսերվանտները նույնպես վնասակար են համարվում:
Չիպսը, տարբեր տեսակի չորահացը, փոփքորնը, որոնք այդքան տարածված են ինչպես մեծերի, այնպես էլ փոքրերի շրջանում եւ պարզապես լի են տարբեր տեսակի քիմիկատներով եւ ճարպերով, նույնպես ֆասթ-ֆուդ են համարվում եւ շատ վնասակար են:
Իսկ եթե հիշենք, որ մարդիկ այս ամենի հետ մեկտեղ նաեւ շաքարով գերհագեցած տարբեր գազավորված ըմպելիքներ են խմում, պարզ է դառնում, թե ինչպես պատահեց, որ Հայաստանը գլխավորեց ամենավատ սննդակարգով երկրների ցուցակը:
Հետևեք NEWS.am Medicine-ին Facebook-ում և Twitter-ում