Ցերեկային քունը բացասաբար է անդրադառնում գիշերային քնի որակի վրա: Այս եզրակացության են եկել ավստրալիացի գիտնականները:
Քվինսլենդի տեխնոլոգիական համալսարանի գիտնականները Քարեն Թորփի գլխավորությամբ պարզել են, ուսումնասիրել են մինչեւ հինգ տարեկան երեխաների քնի տվյալները ներառող ուսումնասիրությունների արդյունքները: Ամփոփելով արդյունքները՝ գիտնականները պարզել են, որ ցերեկային քունը բացասաբար է անդրադառնում երեխայի քնի ընդհանուր որակի վրա:
Երկու տարեկանից մեծ երեխաների մոտ այն ավելացնում էր քուն մտնելու համար անհրաժեշտ ժամանակը՝ կրճատելով գիշերային քնի ընդհանուր տեւողությունը: Գիշերային քունը դառնում էր ավելի կարճ եւ հատվածային: Գիշերվա ընթացքում երեխաները մի քանի անգամ զարթնում էին: «Երեխաները քնում են ցերեկը ոչ թե այն պատճառով, որ վատ են քնել գիշերը, այլ, ընդհակառակը, վատ են քնում գիշերը այն պատճառով, որ քնել են ցերեկը», - նշում է Թորփը:
Դա շատ կարեւոր է, քանի որ գիշերային քունը շատ ավելի մեծ նշանակություն ունի երեխայի ֆիզիկական եւ հոգեբանական տեսանկյունից, քան ցերեկայինը: Գիտությունը վաղուց է ապացուցել, որ գիշերային քնի պակասը երեխաների մոտ հանգեցնում է այնպիսի հետեւանքների, ինչպիսին են վատ հիշողությունը, ցածր առաջադիմությունը, վարքագծի խախտումները, զարգացման հետամնացությունը եւ նույնիսկ գիրացումը:
Ընդգծենք, որ նախկինում Մասաչուսեթսի համալսարանի գիտնականների հետազոտությունը ցույց էր տվել, որ ցերեկային քունը դրական է անդրադառնում ուղեղի աշխատանքի վրա՝ օգնելով 3-5 տարեկան երեխաների ավելի դյուրին մտապահել այս կամ այն ինֆորմացիան: Գիտնականների խոսքով՝ ցերեկային քնի ընթացքում ակտիվանում է գլխուղեղի այն հատվածների աշխատանքը, որոնք պատասխանատու են ուսման եւ նոր տվյալներ մշակելու համար:
Հետևեք NEWS.am Medicine-ին Facebook-ում և Twitter-ում