Angry Birds հայտնի խաղը մեղմում է ցավը վիրաբուժական միջամտությունների ժամանակ: Անսպասելի այս եզրակացության են եկել Նյու Յորքի Կորնելի համալսարանի գիտնականները:
Նրանց խոսքով՝ տեքստային հաղորդագրություններ ուղարկելը եւ Angry Birds խաղալը կարող է նկատելիորեն մեղմել ցավը ոչ այնքան լուրջ վիրաբուժական միջամտությունների ժամանակ: Այն հիվանդները, ում ուշադրությունը փորձում էին շեղել այս կերպ, 50 տոկոսով ավելի քիչ էին ցավազրկող խնդրում:
Հետաքրքրաշարժ այս հետազոտության ընթացքում մարդկանց չորս խմբի էին բաժանել, եւ վերահսկողական խմբում ընդգրկվածները անցնում էին պրոցեդուրաներն առանց ուշադրությունը շեղող որեւէ միջոցների: Նրանք հատկապես սուր ցավ էին զգում: Մնացած երեք խմբերում հիվանդներին սմարթֆոններ էին տալիս: Առաջին խմբի մասնակիցները Angry Birds էին խաղում, երկրորդ խմբում ընդգրկվածները՝ ընկերներին եւ բարեկամներին SMS էին ուղարկում, եւս մեկ խմբում հիվանդները շփվում էին բացարձակապես անծանոթ մարդու հետ տեքստային հաղորդագրությունների միջոցով:
Հատկանշական է, որ այն հիվանդները, որոնք պրոցեդուրայի ընթացքում կարողանում էին SMS ուղարկել, ավելի հազվադեպ էին ցավազրկող պահանջում, քան այն հիվանդները, ովքեր որեւէ կերպ չէին շեղվում: Նույնը վերաբերվում է նաեւ այն մասնակիցներին, ովքեր խաղ էին խաղում: Իսկ բոլորից հազվադեպ ցավազրկողների մասին հիշում էին նրանք, ում հնարավորություն էին տալիս շփվել անծանոթների հետ SMS-ների միջոցով:
Հետևեք NEWS.am Medicine-ին Facebook-ում և Twitter-ում