Աղի բարձր պարունակությամբ սննդակարգը կարող է բացասաբար անդրադառնալ սեռահասունացման վրա, հայտնում են ԱՄՆ Վայոմինգի համալսարանի հետազոտողները:
Էնդոկրինոլոգիայի Եվրոպական կոնգրեսին (European Congress of Endocrinology) մասնակցող գիտնականները ներկայացրել են նոր հետազոտության արդյունքները, որոնք ցույց են տալիս, որ աղի ավելցուկը կարող է բացասաբար անդրադառնալ մարդու վերարտադրողական տարիքի վրա: Աղի ավելցուկը դանդաղեցնում է սեռահասունացմամբ պայմանավորված փոփոխությունները օրգանիզմում, սակայն հատկանշական է, որ աղի պակասը եւս բացասաբար է անդրադառնում առողջության վրա: Հետազոտողների խոսքով՝ ուշ սեռահասունացումը կապված է վարքագծային խնդիրների եւ ֆերտիլության ցածր մակարդակի հետ:
Այս եզրահանգումների են գիտնականները եկել մի խումբ լաբորատոր առնետների վրա իրականացված փորձարկումների արդյունքում: Այն կրծողները, որոնց սննդակարգը հագեցած է եղել աղով, (մարդու համար նախատեսված չափաբաժնից երեք անգամ մեծ չափաբաժնով) ավելի ուշ են սեռահասունացել՝ այն առնետների համեմատ, որոնք աղի փոքր չափաբաժիններ էին ընդունում: Սակայն այն առնետների մոտ, որոնց սննդակարգից աղը բացառված էր, սեռահասունացումը եւս ժամանակին տեղի չէր ունեցել:
ԱՀԿ-ն չափահասներին խորհուրդ է տալիս օրական 5 գրամ աղից ավել չօգտագործել: Միջին վիճակագրական բրիտանացին օրական 8 գրամից ավել աղ է օգտագործում, իսկ ֆասթ ֆուդի սիրահար ԱՄՆ բնակիչը՝ օրական 10 գրամ:
Հետևեք NEWS.am Medicine-ին Facebook-ում և Twitter-ում