Արգենտինայում սոցիալական գովազդ են նկարահանել, որը կոչ է անում դառնալ օրգանների դոնոր: Այն նաեւ ցույց է տալիս, որ շունն իսկապես մարդու ընկերն է եւ որ կապը շան եւ տիրոջ միջեւ իսկապես կարող է լինել շատ, շատ ամուր: Այս տեսանյութը հնարավոր չէ դիտել առանց արցունքների:
Արգենտինայի լյարդի փոխպատվաստման հիմնադրամի համար նկարահանված տեսանյութն արտացոլում է շան եւ տիրոջ կյանքը, որոնք միշտ միասին են: Սակայն մի անգամ տիրոջ ինքնազգացողությունը վատթարանում է, նա հայտնվում է հիվանդանոցում, որտեղ շանը, բնականաբար, չեն թողնում: Շունը մի քանի օր շարունակ սպասում է հիվանդանոցի մուտքի մոտ, սակայն տերը այդպես էլ դուրս չի գալիս:
Նրա փոխարեն սայլակով մի երիտասարդ կնոջ են դուրս բերում, եւ շունը, ծանոթ ինչ-որ բան զգալով, մոտ է վազում նրան: Պարզվում է՝ կնոջը փոխպատվաստել են շան տիրոջ օրգաններից մեկը, ինչի շնորհիվ նա ողջ է մնացել:
Տեսանյութի վերջում ասվում է՝ «Դարձեք օրգանների դոնոր»:
Հետևեք NEWS.am Medicine-ին Facebook-ում և Twitter-ում