Շատերին թվում է, թե քաղցկեղային հիվանդությունները հիմնականում մեծահասակ կամ տարեց մարդկանց են ախտահարում, ու դրա համար էլ երիտասարդները հաճախ ուշադրություն չեն դարձնում ուռուցքների միանգամայն ակնհայտ ախտանիշներին: Մինչդեռ քաղցկեղի վաղ ախտորոշումը դրա հաջող բուժման երաշխիքն է:
Մեծ Բրիտանիայի մասնագետների տվյալներով, յուրաքանչյուր երրորդ դեպքում երիտասարդների մոտ քաղցկեղն ախտորոշվում է շտապ բուժօգնության բաժանմունքներում, ուր նրանց տանում են ուժեղ ցավերով ու արդեն բարդացած հիվանդությամբ:
Ըստ հարցումների՝ դեռահասների մոտավորապես 29 տոկոսը, նրանց ծնողները ու նույնիսկ բժիշկներն ուշադրություն չեն դարձնում քաղցկեղի ակնհայտ ախտանիշների վրա, եթե խոսքը երիտասարդ հիվանդի մասին է: Հենց դրա համար էլ ուռուցքաբանները առանձնացրել են հինգ հիմնական նշան, որոնք ոչ մի դեպքում չի կարելի անտեսել՝ հատկապես երիտասարդների մոտ:
Երկարատեւ ցավ
Եթե ցավը երկար ժամանակ չի վերանում, ու ցավազրկողները առանձնապես չեն օգնում, ապա դրա պատճառները պետք է պարզել անկախ նրանից, թե հատկապես որ տեղն է ցավում: Դիմեք բժշկի թեկուզ ձեր սեփական հանգստության համար:
Ուռուցք, այտուց կամ կոպտուկ
Մարմնի վրա ցանկացած կոշտացում՝ անկախ դրա գտնվելու տեղից, պետք է ցույց տալ բժշկի, ու որքան շուտ ՝ այդքան լավ:
Գերհոգնածություն
Նույնիսկ նորմալ տեւողությամբ քնի դեպքում մշտական հոգնածության զգացումը կարող է քաղցկեղի նշան լինել: Եթե օրվա ընթացքում ձեր ուժերը չեն բավականացնում ամենասովորական առօրյա գործերի համար, ուրեմն բժշկի դիմեք: Իհարկե հոգնածությունը կարող է նաեւ այլ պատճառ ունենալ, բայց ամեն դեպքում թողեք դա բժիշկը պարզի:
Քաշի նկատելի կորուստ
Առանց ձեր կողմից որեւէ ջանքերի (եթե դուք շարունակում եք նույն կենսակերպն ու սնվում եք առաջվա նման) մի քանի կիլոգրամ քաշ կորցնելը կարող է նույնպես վկայել օրգանիզմում սկսված խնդիրների մասին:
Խալի փոփոխություն
Խալի գույնի կամ չափի փոփոխությունը պետք է ձեզ մտահոգի՝ շտապեք հետազոտվել: Եվ իհարկե մի մոռացեք մաշկը միշտ պաշտպանել արեւապաշտպան քսուքներով:
Հետևեք NEWS.am Medicine-ին Facebook-ում և Twitter-ում