Դեպրեսիայից տառապող մարդկանց մեջքն ավելի հաճախ է ցավում: Նման եզրակացության են հանգել Սիդնեյի համալսարանի (University of Sydney) գիտնականներն՝ վերլուծելով 11 հետազոտությունների արդյունքները, որոնց մասնակցել է ավելի քան 23 հազար մարդ:
Պարզվել է, որ մեջքի ցավերի առաջացման ռիսկը զգալիորեն մեծ է դեպրեսիայով տառապող մարդկանց շրջանում: Ընդ որում, ցավի առաջացման հավանականությունն ուղղակիորեն կախված է եղել դեպրեսիայի ծանրությունից:
Պաուլո Ֆերեյրան եւ նրա գործընկերները պարզել են, որ դեպրեսիան մեջքի ցավերի ռիսկը մեծացրել է միջինը 60 տոկոսով: Հեղինակները նշում են՝ որպեսզի բուժումն արդյունավետ լինի, պետք է միաժամանակ պայքարել եւ դեպրեսիայի, եւ մեջքի ցաի դեմ:
Գիտնականներին դեռեւս չի հաջողվում պարզել, թե ինչպես են միմյանց կապված դեպրեսիան եւ մեջքի ցավերը: Նրանք ենթադրում են, որ նման կախվածության պատճառ կարող է լինել այն, որ դեպրեսիայի ժամանակ մարդիկ սովորաբար քիչ են շարժվում եւ վատ են քնում:
Հնարավոր է, իր դերն է խաղում նաեւ գենետիկան. երկվորյակների հետազոտությունների արդյունքում պարզվել է, որ որոշ մարդիկ դեպրեսիայի առաջացման եւ մեջքի ցավերի հակում ունեն:
Հետևեք NEWS.am Medicine-ին Facebook-ում և Twitter-ում