Ամբողջ աշխարհում կրծքի քաղցկեղի վաղ փուլերում ընդունված է կատարել օրգանպահպան վիրահատություններ, այդ թվում` ավշային հանգույցների պահպանմամբ, եթե դրանք ախտահարված չեն: Նման վիրահատությունները կանանց հնարավորություն են տալիս պահպանել կուրծքը, արագ վերականգնվել եւ խուսափել կողմնակի հետեւանքներից` մկանների թուլացումից եւ լիմֆեդեմայից:
Բայց այդ վիրահատությունները մի շարք առանձնահատկություններ ունեն. դրանք կատարվում են քաղցկեղի ամենավաղ փուլերում, քանի դեռ ուռուցքը չի շոշափվում, հատուկ ուշադրություն է դարձվում ավշային հանգույցներին: Այն մասին, թե դա ինչպես է արվում Ֆրանսիայում եւ ինչ կարող են անել Հայաստանում NEWS.am Medicine-ի թղթակցին պատմել է Hopital Prive Nord Parisien կլինիկայի բժիշկ-ուռուցքաբան Կարոլին Դենո Սփեյերը, որը այս օրերին խորհրդատվություններ եւ վիրահատություններ է իրականացնում «Նաիրի» ԲԿ-ում:
Ըստ նրա, կախված ուռուցքի տարածվածությունից` վիրահատությունը կատարվում է պահպանելով կուրծքը. հեռացվում են միայն ուռուցքը եւ շուրջն ընկած հյուսվածքները: Մինչեւ վիրատությունը նախ գնահատվում են ավշային հանգույցները: Վիրահատության մեկնարկից առաջ, անեսթեզիայից հետո, կրծքագեղձի մեջ գունավորող նյութ է ներարկվում (մեթիլենային կապույտ): Այն ավշի շրջանառման քարտեզ է ստեղծում, որը ցույց է տալիս քաղցկեղի տարածվածությունը եւ ավշային` այսպես կոչված պահակային հանգույցի քաղցկեղային բջիջների առկայությունը:
Վիրահատության ընթացքում պահակային ավշային հանգույցի հյուսվածքաբանական հետազոտություն է իրականացվում: Եթե պատասխանը բացասական է, ապա հիվանդի թեւատակերի ավշային հանգույցները չեն հեռացվում: Դա հնարավորություն է տալիս խուսափել հետագա բարդություններից` ձեռքի մկանների թուլացումից եւ լիմֆեդեմայից: Իսկ եթե պահակային հանգույցը քաղցկեղային բջիջներ է պարունակում, բոլոր ավշային հանգույցները հեռացվում են:
Կարոլին Դենո Սփեյերը պատմել է, որ արդեն երկրորդ օրն է «Նաիրի» ԲԿ-ում ընդունում է հայաստանցի հիվանդներին, որոնց մեծամասնության մոտ ուռուցքները արդեն բավական տարածվել են:
Ֆրանսիացի բժիշկը հայ կանանց կոչ է անում առավել պատասխանատու վերաբերվել սեփական առողջությանը` պարբերաբար դիմել համապատասխան մասնագետների, անցնել անհրաժեշտ հետազոտություններ:
«Նաիրի» ԲԿ տնօրինության նախաձեռնությամբ Ֆրանսիացի հայտնի բժիշկ-ուռուցքաբան Կարոլին Դենո Սփեյերի խորհրդատվությունները իրականացվում են անվճար:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր