Մոտ ապագայում մաշկի քաղցկեղի տարատեսակներից մելանոման հնարավոր կլինի ախտորոշել առանց բիոփսիայի. Tufts University-ի հետազոտողների խումբը որպես այս ինվազիվ միջամտության այլընտրանք է առաջարկում բարձր ճշգրտության միկրոսկոպիայի օգտագործումը:
Նոր տեխնոլոգիան թույլ կտա դիտել հիվանդի միտոքոնդրիումները, որոնք գտնվում են մաշկի բջիջներում: Մելանոմայի զարգացման դեպքում միտոքոնդրիումները սկսում են բջիջներում անկանոն դասավորվել, իսկ նորմայի դեպքում դրանք բավական կազմակերպված կառուցվածքներ են ձեւավորում: Սովորաբար ախտորոշելիս հիվանդի մաշկի ոչ մեծ կտոր է վերցվում, որը հետագայում հետազոտվում է լաբորատորիայում: Նմուշը հատուկ ներկանյութով է ներկվում, որից հետո այն դիտում են մանրադիտակով:
Սակայն նշված համալսարանի գիտնականները որոշել են օգտվել մուլտֆոտոնային մանրադիտակից, որի օգնությամբ կարելի է տեսնել միտոքոնդրիումներում առկա ՆԱԴՖ (նիկոտինամիդադենինդինուկլեոտիդֆոսֆատ) մոլեկուլները, որոնք ընդունակ են լուսարձակելու լույսի որոշակի երկարության ալիքի ազդեցությամբ: Դրա համար ոչ մի լրացուցիչ ներկանյութ օգտագործելու կարիք չկա:
Գիտնականներն արդեն տեխնիկան թեստավորել են մաշկի քաղցկեղով՝ ագրեսիվ մելանոմայով կամ ավելի քիչ վտանգավոր տեսակով՝ բազալ բջջային կարցինոմայով տառապող 10 հիվանդների վրա: Հետազոտվել է նաեւ 4 առողջ մարդկանց մաշկը:
Հիվանդներին հետազոտությունը բացարձակ ցավ չի պատճառել եւ տեւել է 1 րոպեից ոչ ավելի: Ստացված պատկերների անալիզը կատարվել է ավտոմատ ռեժիմում, որը տեւել է եւս երկու րոպե: Հետազոտողներին հաջողվել է ուռուցքային հյուսվածքները առողջներից ճշգրիտ տարբերակել՝ ուսումնասիրելով միտոքոնդրիումների դասավորությունը: Ախտորոշումը հաստատվել է նաեւ սովորական բիոփսիայի միջոցով:
Այսպիսով, գիտնականների առաջարկած տեխնոլոգիան կարող է դառնալ բիոփսիայի հիանալի այլընտրանք:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր