«Նաիրի» ԲԿ-ի վիրաբույժներին հաջողվել է փրկել զարկերակի մեծ անևրիզմայով պացիենտի փայծաղը

25 ապրիլի, 2024 21:06

«Նաիրի» բժշկական կենտրոնի վիրաբույժներին հաջողվել է լապարոսկոպիկ եղանակով հեռացնել փայծաղային զարկերակի մեծ անևրիզման՝ պահպանելով պացիենտի փայծաղը: Վիրահատությունը կատարել է Էնդոսկոպիկ և լապարոսկոպիկ վիրաբուժության թիվ 1 բաժանմունքի վարիչ Անդրանիկ Ադամյանը։

Բաժանմունքի վիրաբույժ Տիգրան Ադամյանը NEWS.am Medicine-ին հայտնել է, որ պացիենտը «Նաիրի» բժշկական կենտրոն է դիմել որովայնի ձախ մասի ցավով։ Կոնտրաստային համակարգչային տոմոգրաֆիայով հայտնաբերվել է փայծաղային զարկերակի անևրիզմալ լայնացում՝ 6 սմ չափով:

1.jpg (146 KB)

Ի՞նչ է փայծաղային զարկերակի անևրիզմը և ինչո՞ւ է այն վտանգավոր

Անևրիզման զարկերակի բացվածքի տեղային լայնացումն է՝ զարկերակի պատի փոփոխությունների կամ վնասման հետևանքով: Փայծաղային զարկերակի այսպիսի լայնացումը բավական հազվադեպ հանդիպող պաթոլոգիա է, բայց նաև բավական վտանգավոր՝ պատռվելու վտանգի պատճառով, մանավանդ, երբ լայնացումը մեծ է:

Փայծաղային զարկերակի անևրիզմի հանկարծակի պատռման դեպքում որովայնի խոռոչում ուժեղ արյունահոսություն է սկսվում, որը կարող է հանգեցնել մահվան:

Փայծաղային զարկերակի անևրիզմայի բուժումը

Փայծաղային զարկերակի անևրիզման բուժվում է վիրահատական եղանակով: Խոշոր անևրիզմնաների դեպքում, սովորաբար, կատարվում է բաց կամ լապարոսկոպիկ վիրահատություն՝ փայծաղի հեռացմամբ, իսկ որոշ դեպքերում՝ հարակից այլ օրգանների հեռացմամբ ևս։ Վերջերս լայնորեն տարածված է նաև էնդովասկուլյար էմբոլիզացիայի եղանակը, սակայն դրա կիրառումը միշտ չէ, որ հնարավոր է՝ անևրիզմայի չափերի և տեղակայման պատճառով։

Փայծաղի պահպանում. ինչու՞ է դա կարևոր

Փայծաղը անչափ կարևոր օրգան է մարդու իմունային համակարգի անխափան աշխատանքի համար։ Փայծաղը մեր լիմֆոցիտների՝ իմունային բջիջների, ինչպես նաև հակամարմինների աղբյուրն է, որոնք պատասխանատու են վարակների դեմ մեր օրգանիզմի պայքարելու համար:

2.jpg (103 KB)

Հենց այդ հանգամանքը հաշվի առնելով՝ «Նաիրի» ԲԿ-ում որոշել են կատարել նվազագույն ինվազիվ լապարոսկոպիկ վիրահատություն՝ փայծաղի պահպանմամբ։ Ինչը և հաջողությամբ իրականացվեց։

«Փայծաղային զարկերակի անևրիզման, որը սնվում էր հիմնական զարկերակից, հատվել և հեռացվել է կարող սարքերի միջոցով: Եվ որ ամենակարևորն է, կատարվել է օրգանապահպան վիրահատություն՝ հիվանդի համար նվազ տրավմատիկ եղանակով: Հիվանդը ներկայում գտնվում է Նաիրի ԲԿ-ում՝ բժիշկների հսկողության տակ»,- ասել է Տիգրան Ադամյանը։

ARS_2060.JPG (837 KB)