• Latest news

Ինչպե՞ս ամռան շոգին խնամել փոքրիկ երեխաներին. Մանկաբույժի խորհուրդները

17 հուլիսի, 2018  21:18

Ինչպե՞ս կազմակերպել մինչեւ մեկ տարեկան երեխայի խնամքն ամառվա շոգին: Ամռանը փոքրիկների համար ո՞ր հիվանդություններն են ավելի վտանգավոր, ի՞նչ անել՝ դրանք կանխարգելելու համար: NEWS.am Medicine-ի այս եւ այլ հարցերին պատասխանում է մանկաբույժ Մարի Դարակչյանը:

Ամռան սեզոնին ի՞նչ տեսակի ալերգիաներ կարող են առաջանալ մինչեւ 1 տարեկան երեխաների մոտ եւ ինչպե՞ս երեխային պաշտպանել նման ալերգիաներից:

Մինչեւ 1 տարեկան երեխաների մոտ առավել հաճախ դիտվում են մաշկի ալերգիկ ախտահարումները, որոնք սովորաբար չունեն սեզոնայնություն: Ալերգիկ ռինիտը, որն առավելապես դիտվում է գարնան եւ ամռան ամիսներին, չի ախտորոշվում մինչեւ 1 տարեկան երեխաների մոտ: Մանկաբույժների ամերիկյան ասոցիացիայի համաձայն՝ ալերգիկ ռինիտի ախտորոշման նվազագույն տարիքը 2 տարեկանն է, սակայն այն առավելապես ախտորոշվում է վաղ դպրոցական կամ նախադպրոցական տարիքում:

Ի՞նչ խնամք է անհրաժեշտ մինչեւ 1 տարեկան երեխային՝ ամռան ընթացքում զերծ պահելու համար ցանկացած տեսակի հիվանդություններից:

Ամռան ընթացքում կարեւոր է պահպանել մաշկի հիգիենան, երեխային լողացնել ամեն օր, իսկ շատ շոգ եղանակին՝ օրական 2 անգամ: Լոգանքը պետք է կազմակերպել մաքուր ջրով եւ մանկական լոգանքի գելով: Երեխային պետք է պաշտպանել արեւի ուղիղ ճառագայթներից՝ հագցնելով գլխարկ, երկարաթեւ հագուստ եւ արեւային ակնոց: Եթե երեխան բաց մարմնով արեւի ճառագայթների տակ է, ապա պետք է օգտագործել արեւապաշտպան քսուքներ:

Ամռանն ի՞նչ ջերմաստիճանային միջավայր է խորհուրդ տրվում մինչեւ 1 տարեկան երեխայի համար:

Սենյակի օպտիմալ ջերմաստիճան է համարվում միջինը 20 աստիճանը, սակայն հաշվի առնելով մեր տարածաշրջանի առանձնահատկութկունները, կարելի է առավելագույնն ունենալ 24 աստիճան: Եթե կա օդորակիչ, ապա դրա օգտագործումը ցուցված է շոգ եղանակին, քանի որ ջերմակարգավորման կենտրոնի անբավարար զարգացման հետեւանքով երեխան կարող է սենյակի բարձր ջերմաստիճանի պատճառով ջերմել, առատ քրտնել, ջրազրկվել, հրաժարվել սնունդ ընդունել եւ զրկվել առողջ քնից:

Ի՞նչ պատվաստումներ պետք է ստանա ամռանը մինչեւ 1 տարեկան երեխան եւ ինչի՞ համար են դրանք համարվում պարտադիր պրոցեդուրաներ:

Պատվաստումները շոգ եղանակին արվում են նույն սխեմայով, ինչ մյուս եղանակներին: Երբեմն մայրերին անհանգստացնում է երեխայի հնարավոր ջերմելը, ինքնազգացողության վատացումը, սննդից հրաժարվելը: Սակայն, ԱՆ խորհուրդների համաձայն, դրանք պատվաստումների հետաձգման համար ցուցում չեն: Այլ պատվաստումներ, կապված ամառվա սեզոնի հետ, չեն արվում:

Տարբերվո՞ւմ է, արդյոք, մինչեւտարեկան երեխայի սնունդն ամռանը: Եթե այո, ապա ինչո՞վ է դա պայմանավորված:

Մինչեւ 1 տարեկան երեխաների սնունդը չի տարբերվում այլ սեզոններին տրվող սննդից: Հաշվի առնելով ջրազրկման մեծ հավանականությունը՝ պետք է կրծքով կերակրվող երեխային առավել հաճախ եւ երկար կերակրել, իսկ 6 ամսականից մեծ երեխաներին բավականաչափ կրծքի կաթ եւ ջուր տալ:

Շոգ եղանակներին կարո՞ղ է մինչեւ 1 տարեկան երեխաների մոտ առաջանալ դիսբակտերիոզ եւ ո՞րն է դրա բուժումը:

Դիսբակտերիոզ ախտորոշումը կլինիկական ախտորոշում չէ: Եթե կա փորլուծություն, փսխում, ջերմության բարձրացում, ապա պետք է դիմել մանկաբույժի, որի կողմից կտրվի ախտորոշում եւ կնշանակվի համապատասխան բուժում:

Ամռան ընթացքում մինչեւ 1 տարեկան երեխաների շրջանում ամենատարածված ո՞ր հիվանդոությունները կարող են հետք թողնել երեխայի օրգանիզմի վրա եւ հետագայում խնդիրներ առաջացնել:

Ամռան ընթացքում առավել հաճախ են ախտորոշվում աղեստամոքսային տրակտն ախտահարող հիվանդություններ՝ կապված մրգերի, բանջարեղենի առավել շատ օգտագործման, լողավազաններ, ծովափ, բաց ջրամբարներ հաճախելիության ավելացման հետ: Հաճախ դրանք արտահայտվում են լուծով, փսխումով, եւ այդ ամենը կարող է բերել ջրազրկման: Ջրազրկման կանխարգելման համար կարելի է օգտագործել օրալ ռեհիդրատացիոն լուծույթներ, ջուր, իսկ եթե երեխան կրծքով է կերակրվում, ապա հաճախակի կերակրել: Խնդիրներ նկատելու դեպքում պետք է հնարավորինս շուտ դիմել բժշկի, քանի որ ջրազրկումը կարող է առաջացնել անգամ կյանքին վտանգ սպանացող բարդություններ: 

Հետևեք NEWS.am Medicine-ին Facebook-ում և Twitter-ում


  • Այս թեմայով
 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է