D վիտամինի պակասը կարող է վաղաժամ մահվան պատճառ դառնալ

Մինչ այժմ իրականացված հետազոտությունների արդյունքների վերլուծությունը ցույց է տվել, որ D վիտամինի պակասը նշանակալի ազդեցություն է թողնում վաղաժամ մահվան ցուցանիշների վրա: Հիշյալ հետազոտությունների շրջանակում մասնավորապես վիտամինների պակասի եւ քաղցկեղային հիվանդությունների ու պսակաձեւ անոթների շրջանառության խանգարումների կապն է ուսումնասիրվել, տեղեկացնում է NewsMax Health-ը:

Չնայած D վիտամինի կանխարգելիչ հատկանիշների շուրջ միասնական կարծիք դեռեւս չի ձեւավորվել, The American Journal of Public Health պարբերականի կայքում հրապարակված հոդվածի համաձայն, 32 հետազոտությունների արդյունքների վերլուծությունը մասնավորապես ցույց է տվել, որ արյան մեջ վիտամինի` 9 նանոգրամ/միլիլիտր-ից ցածր բաղադրություն ունեցող մարդիկ, 50-ից բարձր նանոգրամ/միլիլիտր բաղադրությամբ վիտամին կրողների համեմատությամբ, վաղաժամ մահանալու կրկնակի ռիսկի են ենթարկվում: 

Քալիֆորնիա-Սան Դիեգո համալսարանի ընտանիքի եւ կանխարգելիչ բժշկության բաժնի պրոֆեսոր Սեդրիք Գարլանդի խոսքով, D վիտամինի պարունակությամբ հավելումները վտանգ չեն ներկայացնում առողջությանը, «քանի դեռ արյան բաղադրությունը 200  նանոգրամ/միլիլիտրից չի անցել»:

Հետևեք NEWS.am Medicine-ին Facebook-ում և Twitter-ում