COVID-19-ի բուժման համար ռեմդեսիվիրի կլինիկական փորձարկումները դադարեցրել են

ԱՄՆ-ում գիտնականները դադարեցրել են ռեմդեսիվիրի՝ հակավիրուսային դեղամիջոցի կլինիկական փորձարկումները, որը մինչեւ վերջերս համարվում էր ամենահեռանկարային հավանական դեղամիջոցը COVID-19-ի բուժման համար: Այս մասին հայտնել է ԱՄՆ Ալերգիայի եւ վարակիչ հիվանդությունների ազգային ինստիտուտը (NIAID), որը անցկացնում էր փորձարկումները։

BBC-ն հայտնում է, որ փորձարկումները դադարեցվել են ոչ թե ձախողման պատճառով, այլ ընդհակառակը՝ գիտնականները որոշել են չսպասել վերջնական արդյունքների, որպեսզի թույլ չտան նոր մահեր վերահսկվող խմբի պացիենտների շրջանում, որոնք պլացեբո են ընդունում։

Հետազոտության նախնական արդյունքներն ամփոփվել են երկու շաբաթ առաջ՝ ավելի քան երկու ամիս փորձարկումներից հետո: Դրանք կազմակերպիչներին այնքան հուսադրող էին թվացել, որ ամերիկյան իշխանությունները այդ առիթով հրապարակել էին զգուշավոր լավատեսությամբ լի հատուկ հայտարարություն՝ հիվանդանոցային պայմաններում պացիենտին ռեմդեսիվիր նշանակելը գրեթե մեկուկես անգամ արագացնում է նրա դուրսգրումը։

«Տվյալները ցույց են տալիս, որ ռեմդեսիվիրը ունի միանշանակ էական դրական ազդեցություն՝ արագացնելով ապաքինումը»,- ասել էր ինստիտուտի ղեկավար Էնթոնի Ֆաուչին:

Ընդամենը մի քանի օր անց ամերիկյան իշխանությունները հավանություն էին տվել ռեմդեսիվիրի օգտագործմանը` արտակարգ կերպով COVID-19-ի բուժման համար (այսինքն` նախքան պարտադիր հավաստագրումը):

Սակայն, ապացուցողական բժշկությունը ընդունում է դեղամիջոցի արդյունավետությունը ստուգելու միայն մեկ միջոց՝ կույր կրկնակի փորձարկման մեթոդը: Փորձի մասնակիցները պատահական կերպով բաժանվում են երկու խմբի՝ առաջին խմբի պացիենտները ստանում են նոր դեղամիջոց, իսկ մյուսինը՝ պլացեբո:

Սակայն համավարակի պայմաններում ապացուցողական գիտության խիստ պահանջները հաճախ անլուծելի հակասության մեջ են մտնում բժշկական էթիկայի հետ: Խնդիրն այն է, որ եթե փորձարկվող դեղամիջոցը կարող է թեկուզ մի քիչ օգնել վարակի դեմ պայքարում, ապա ծանր հիվանդները, որոնք դրա փոխարեն դատարկ-պլացեբո են ստանում (եւ նույնիսկ դրա մասին չեն կասկածում) մահվան ռիսկի են ենթարկվում միայն այն բանի համար, որ պատահաբար հայտնվել են փորձարկումների խմբում։

Սակայն փորձնական դեղամիջոցը առանց բացառության բոլոր պացիենտներին տալու դեպքում հետազոտության պայմանները կխախտվեն, եւ, հետեւաբար, դեղամիջոցի արդյունավետությունը որոշելը անհնար կլինի:

Ռեմդեսիվիրի դեպքում հենց պարզվեց, որ դեղամիջոցը կարող է արդյունավետ լինել, այն անմիջապես սկսեցին տալ բոլոր հիվանդներին՝ վերացնելով վերահսկվող խումբը, եւ հետազոտությունը կորցրեց իմաստը:

Քանի՞ պացիենտի կյանք ենք պատրաստ ռիսկի ենթարկել՝ պակաս տվյալները ստանալու համար»,- հռետորական հարց է տալիս NIAID-ի կլինիկական տնօրեն Քլիֆորդ Լեյնը։

Այնուամենայնիվ, շատ փորձագետներ հաստատում են, որ փորձը դադարեցնել չէր կարելի՝ մի ամբողջ շարք պատճառներով:

Հետևեք NEWS.am Medicine-ին Facebook-ում և Twitter-ում