Գիտնականները հայտնաբերել են ավելի քան 568 գեներ, որոնք քաղցկեղ առաջացնելու հավանականություն ունեն

Բարսելոնայի գիտահետազոտական ինստիտուտի կենսաբժշկական գենոմիկայի լաբորատորիայի գիտնականները ուսումնասիրել են 66 տարբեր տեսակի 28 000 ուռուցքներ եւ հայտնաբերել են 568 գեներ, որոնք խթանում են չարորակ հիվանդությունների զարգացումը:

Այս ուսումնասիրությունը թույլ է տվել թարմացնել ինտեգրված ուռուցոգենոմիկայի հարթակը (IntOGen), որն ուղղված է քաղցկեղի մուտացիաների դրայվեր-գեների նույնականացմանը: Ուսումնասիրության արդյունքները հրապարակվել են Nature Review Cancer ամսագրում, եւ դրանք իրենցից ներկայացնում են մինչ օրս քաղցկեղի զարգացման հետ կապված գեների առավել ընդգրկուն ցուցակը:

«Դրայվեր-գեների ցուցակը քաղցկեղի հետազոտողներին, ինչպես կլինիկական, այնպես էլ հիմնական հետազոտություններում, տրամադրում է կարեւոր գիտելիքներ եւ ազդում է կլինիկական որոշումների ընդունման վրա»,- ասում է վերլուծության հեղինակ Նուրիա Լոպես-Բիգասը: «Օրինակ, եթե մենք գիտենք, որ ուռուցքի քաղցկեղածին կարողությունը կախված է որոշակի սպիտակուցից, ապա դրա գործառույթին խոչընդոտող դեղամիջոցները ուռուցքաբանների կողմից կարող են օգտագործվել պացիենտի բուժման համար»:

Հետևեք NEWS.am Medicine-ին Facebook-ում և Twitter-ում