Շնչի ջերմաստիճանը՝ թոքերի քաղցկեղի ախտորոշման միջոց

Նոր հետազոտության շնորհիվ բժիշկներն այսուհետ կարող են թոքերի քաղցկեղը շնչի ջերմաստիճանի չափման միջոցով ախտորոշել:

Եզրահանգման համար հիմք ծառայած փորձարկումների փուլին 82 կամավորներ են մասնակցել, որոնց մոտ, ռենտգեն հետազոտության արդյունքներով, թոքերի քաղցկեղ է կասկածվել: Շնչի ջերմաստիճանի ստուգման ենթարկված մասնակիցներն այնուհետեւ, հստակ ախտորոշում ստանալու նպատակով, կլինիկական հետազոտության են ենթարկվել, հաղորդում է FoxNews-ը:

Օրգանիզմից արտաշնչվող գազերի ջերմաստիճանը չափող՝ X-Halo անվանումը ստացած սարքի օգնությամբ գիտահետազոտական խմբի անդամները, իրավամբ, մասնակիցներից 42-ի մոտ քաղցկեղ են ախտորոշել՝ այն հիմնավորմամբ, որ նրանց շնչի ջերմության աստիճանը նկատելիորեն բարձր ցուցանիշ է գրանցում: Ընդ որում, հիշյալ ցուցանիշը, փորձարկման արդյունքների համաձայն, ուղիղ համեմատական է ծխելու սովորությամբ բնորոշվող տարիների թվի եւ քաղցկեղի զարգացման փուլի հետ: 

«Իրականացված հետազոտության արդյունքներն այն մասին են վկայում, որ թոքերի քաղցկեղը արտաշնչման ենթակա գազերի ջերմությունը բարձրացնելու հատկություն է դրսեւորում», - նշել է հետազոտության ավագ հեղինակ, Իտալիայում գործող Ֆոջայի համալսարանի պրոֆեսոր Ջիովաննա Էլիսինիա Կամպանյանոն:

Հետևեք NEWS.am Medicine-ին Facebook-ում և Twitter-ում