Ձու՝ օգտակա՞ր, թե՞ վնասակար

Նորագույն հետազոտությունը, որը վերլուծել է ավելի քան կես միլիոն մարդու տվյալները, ցույց է տվել, որ ձու ուտելը առողջության համար ռիսկեր  է պարունակում: Հետազոտության մասնակիցներին հետեւել են մոտ 16 տարի։ Նրանք ամեն տարի լրացրել են իրենց սննդակարգի վերաբերյալ մանրամասն հարցաթերթիկներ:

Օրական յուրաքանչյուր հավելյալ 300 մգ խոլեստերինի կամ կես ձվի օգտագործումը կապված է եղել ցանկացած պատճառով մահվան վտանգի ավելացման հետ, այդ թվում քաղցկեղով (7 տոկոս)։

Միեւնույն ժամանակ, խոսքն այդ ցուցանիշի վրա ձվի սպիտակուցների ազդեցության մասին չի եղել։

PLoS Medicine-ում հրապարակված հետազոտության հեղինակները կարծում են, որ սննդակարգում խոլեստերինի եւ հատկապես ձվի դեղնուցի սահմանափակումը պետք է նվազեցնի մահվան ռիսկը:

Օրական քանի ձու կարելի է ուտել առանց առողջության համար ռիսկի

 Ձուն սննդային խոլեստերինի կարեւոր աղբյուր է։ Գիտնականները վաղուց են վիճում, թե որքանով է վտանգավոր  այն ուտելը եւ օրական քանի ձու կարելի է ուտել:

Science Media Centre-ի մեկնաբանություններում մի շարք փորձագետներ թերահավատորեն են մոտեցել աշխատանքին։

«Հետազոտության ամենամեծ թերությունն այն է, թե ինչպես են հավաքվել ձվի օգտագործման վերաբերյալ տվյալները», - ասում է Գլազգոյի համալսարանի ավագ դասախոս Ադա Գարսիան: Երբ մարդկանց խնդրում են հիշել, թե ինչ են նրանք կերել ամբողջ տարվա ընթացքում, հնարավոր են մեծ թվով սխալներ, հիշեցրել է նա։ Նման ուսումնասիրությունները կարող են ճշգրիտ արդյունքներ չտալ:

«Մենք սննդային համակցություններով ենք սնվում, եւ սննդակարգի մեկ առանձին ասպեկտը՝ այս դեպքում՝ ձուն, չի կարող բոլոր խնդիրների պատճառ լինել», - ասել է  Գարսիան:

Սուրեյի համալսարանի նյութափոխանակության մասնագետ, պրոֆեսոր Բրյուս Գրիֆինը նշում է, որ նախկինում հայտնի էր մեծ թվով ձու ուտելու եւ սննդային խոլեստերինի եւ անառողջ ապրելակերպի միջեւ կապը: Հետեւաբար, սննդակարգում ձվի «ազդեցությունը» կարող է պայմանավորված լինել այլ գործոններով: Նրանք, ովքեր շատ ձու են ուտում, հակված են ավելի շատ յուղոտ եւ ավելի քիչ առողջ սնունդ (բանջարեղեն, մրգեր) ուտել: Նրանք կարող են ունենալ ավելի ցածր եկամուտ եւ կրթություն:

«Չնայած երկար տարիների հետազոտություններին՝ սննդակարգում եւ առողջության համար ձվի մասին հարցը մնում է անպատասխան: Բազմաթիվ համաճարակաբանական հետազոտություններ տվել են հակասական արդյունքներ․ մի մասը նշում է, որ չափավոր քանակությամբ ձուն օգտակար է, մյուսները պնդում են, որ դրանք կարող են վնասակար լինել: Այս ուսումնասիրությունը, թեեւ որակյալ է կատարվել, միայն ավելի շատ աղմուկ է ավելացնում  քննարկմանը», - ասում է Լոնդոնի համալսարանական քոլեջից Ռիյազ Պատելը:

Հետևեք NEWS.am Medicine-ին Facebook-ում և Twitter-ում