ԱՀԿ-ն հայտնել է  2000 թվականից ի վեր աշխարհում ծխախոտի սպառման նվազման մասին

Մոտ 1,25 միլիարդ մարդ կամ մոլորակի յուրաքանչյուր հինգերորդ չափահաս մարդ օգտագործում է ծխախոտ: Առողջապահության համաշխարհային կազմակերպությունը (ԱՀԿ) հայտնել է, որ 2000 թվականին այդ համամասնությունը յուրաքանչյուր երրորդից մեկն էր, ինչը երկու տասնամյակի ընթացքում տեղի ունեցած փոփոխությունը ցույց է տալիս, որ ծխախոտի սպառման նվազում է գրանցվել:

Ինչպես նշվում է ԱՀԿ զեկույցում, «ծխախոտի օգտագործումը նվազում է, չնայած ծխախոտի արդյունաբերության ջանքերին՝ վտանգելու առաջընթացը»։ Կազմակերպության վերջին գնահատականների համաձայն՝ «աշխարհում կա 1,25 միլիարդ չափահաս ծխախոտ օգտագործող»: «2022 թվականի միտումները վկայում են համաշխարհային ծխախոտի օգտագործման շարունակական անկման մասին, երբ աշխարհում ծխախոտ է օգտագործում յուրաքանչյուր հինգերորդ չափահասը՝ 2000 թվականի երրորդից մեկի համեմատ», - ասում են փորձագետները:

Հաջողություններ են գրանցվել 150 երկրներում։ Մասնավորապես, Բրազիլիայում 2010 թվականից ի վեր ծխախոտի սպառումը նվազել է 35%-ով։ «Վերջին տարիներին լավ առաջընթաց է գրանցվել ծխախոտի դեմ պայքարի ոլորտում, սակայն այժմ ինքնագոհ լինելու ժամանակը չէ», - ասում է ԱՀԿ-ի առողջապահության խթանման տնօրեն Ռյուդիգեր Կրեխը: Նա նշում է, որ ծխախոտի արդյունաբերությունը «անհամար կյանքերի հաշվին շահույթ է հետապնդում» և «օգտվում է առողջապահական քաղաքականությունը շահարկելու և իր մահացու արտադրանքը վաճառելու հնարավորությունից»: Այս կապակցությամբ ԱՀԿ-ն կոչ է անում երկրներին շարունակել պայքարել ծխախոտի և «ծխախոտի արդյունաբերության ազդեցության» դեմ։

Զեկույցի համաձայն՝ ծխախոտ օգտագործող բնակչության ամենաբարձր մասնաբաժինը գրանցվել է Հարավարևելյան Ասիայի տարածաշրջանում՝ 26,5%: Եվրոպական տարածաշրջանում իրավիճակը ավելի լավ չէ (25,3%)։ Եվրոպական տարածաշրջանի կանանց շրջանում ծխախոտի օգտագործումն ավելի քան կրկնակի է, քան համաշխարհային միջինը, և նվազումը շատ ավելի դանդաղ է, քան մյուս տարածաշրջաններում: Փորձագետների կանխատեսումների համաձայն՝ մինչև 2025 թվականը ծխախոտի օգտագործումը 2010 թվականի համեմատությամբ կնվազի 25 տոկոսով։ Աշխարհում ընդամենը 56 երկիր կհասնի 30 տոկոս կրճատման։ Վեց երկրում «դեռևս նկատվում է ծխախոտի օգտագործման աճ»։ Դրանք են Եգիպտոսը, Ինդոնեզիան, Հորդանանը, Կոնգոն, Մոլդովան և Օմանը:

Հետևեք NEWS.am Medicine-ին Facebook-ում և Twitter-ում