Շոգեբաղնիք այցելություններն օգնում են խուսափել դաշտանադադարի ժամանակ քաշի ավելացումից. HealthNews

Մասաչուսեթսի համալսարանի գիտնականները պարզել են, որ շոգեբաղնիքի օգտագործումը կարող է պարզ ռազմավարություն լինել մկների մոտ ինսուլինի դիմադրության և գիրության զարգացումը կանխելու համար՝ կապված դաշտանադադարի հետ: Այս մասին հայտնում է Health News-ը՝ հղում անելով NUTRITION 2024 առցանց հարթակին։

Գիտնականները բացատրել են, որ դաշտանադադարի սկիզբը (կանանց դաշտանի դադարեցումը) բնական գործընթաց է, որը կարող է ուղեկցվել բազմաթիվ տհաճ ախտանիշներով, ինչպիսիք են քնի խանգարումները և քաշի ավելացումը։ Որոշ ուսումնասիրություններ ցույց են տվել, որ կանայք տարեկան միջինը մեկ ֆունտ (ավելի քան չորս հարյուրուկես գրամ) ավելացնում են դաշտանադադարի մեջ մտնելու ժամանակ, և նրանց 20%-ը կարող է զգալ 10 ֆունտ (4,54 կգ) քաշի ավելացում:

Առողջապահության մասնագետները կարծում են, որ կանանց հորմոնների մակարդակի նվազումը, մկանային զանգվածի կորուստը և բնական ծերացումը մարմնում նյութափոխանակության փոփոխություններ են առաջացնում, ինչը հանգեցնում է քաշի ավելացման: Ավելին, այս փոփոխությունները դժվարացնում են ազատվել այն կիլոգրամներից, որոնք կուտակել եք դաշտանի դադարեցումից հետո:

Պարզելու համար, թե արդյոք ջերմային ազդեցությունը կարող է դրական ազդեցություն ունենալ նյութափոխանակության առողջության վրա, գիտնականները փորձարկում են անցկացրել մկների վրա: Գեր (հատուկ սննդակարգին հետևելու արդյունքում) տարեց էգ կրծողները բաժանվել են երկու խմբի. առաջին խմբին 12 շաբաթ շարունակ օրական 30 րոպե պարբերաբար տեղադրում էին 40 աստիճան Ցելսիուսի ջերմաստիճանի հատուկ ջերմաթերապիայի խցիկում: Կրծողների երկրորդ խումբը չի ենթարկվել ջերմության:

Փորձի արդյունքները ցույց են տվել, որ «դաշտանադադարի մեջ գտնվող» էգ մկների մոտ տարիքի հետ կապված հյուսվածքների ավելի քիչ վնաս է եղել՝ համեմատած երկրորդ խմբի կրծողների հետ: Ավելին, ջերմային թերապիան օգնեց բարելավել կրծողների ինսուլինի զգայունությունը և մարմնի ճարպերի այրման արագությունը:

Գիտնականների խոսքով՝ ջերմությունը մեծացրել է TRPV1 կոչվող մոլեկուլի ակտիվությունը, որը բջջային թաղանթում գործում է որպես կալցիումի իոնային ալիք։ Հետազոտողները բացատրել են, որ ակտիվ TRPV1-ը խթանում է կալցիումի ցիկլը բջիջներում, ինչը խթանում է էներգիայի ծախսերի ավելացումը և ճարպերի այրումը:

Գիտնականները ենթադրել են, որ ջերմային թերապիան կարող է նաև օգտակար լինել այն մարդկանց, հատկապես կանանց համար, ովքեր դժվարությամբ են դիմանում ֆիզիկական ակտիվությանը: Պարզելու համար, թե արդյոք սաունա այցելելն իսկապես արդյունավետ է մարդկանց քաշի կորստի գործընթացի խթանման համար, անհրաժեշտ է ավելի շատ հետազոտություն:

Հետևեք NEWS.am Medicine-ին Facebook-ում և Twitter-ում