Գիտնականները հայտնաբերել են անսպասելի գործոն, որն ազդում է հղիության տեւողության վրա

Ավստրալիայում գրեթե 400 000 կենդանածին ծննդաբերությունների վերլուծությունը ցույց է տվել, որ այն կանայք, որոնք հղիության ընթացքում ենթարկվել են շատ տաք կամ ցուրտ ջերմաստիճանի եւ օդի աղտոտվածության բարձր մակարդակի (PM2.5) ազդեցությանը, ավելի հավանական է, որ ծննդաբերեն 41 շաբաթում նրանց համեմատ, ովքեր չեն ենթարկվել այդ ազդեցություններին:

Հղիության միջին տեւողությունը սովորաբար կազմում է մոտ 40 շաբաթ, մինչդեռ 41 կամ 42 շաբաթից հետո ծնված երեխաները կոչվում են «լրիվ ժամկետում» ծնվածներ:

Ծննդաբերության հետաձգումը կարող է մեծացնել երեխայի աճի հետ կապված բարդությունների վտանգը, ներառյալ հեշտոցային արյունահոսությունը կամ արյունահոսությունը ծննդաբերության ընթացքում, եւ ծննդաբերությունից հետո մեռելածնության կամ մահվան հավանականությունը:

Նոր հետազոտությունն իրականացրած գիտնականները իրենց բացահայտումները նկարագրել են Urban Climate ամսագրում հրապարակված հոդվածում: Նրանք նշել են, որ առաջին անգամ է ուսումնասիրվել, թե ինչպես կլիմայի փոփոխությունը կարող է ազդել երկարատեւ հղիության ռիսկի վրա:

Ընդհանուր առմամբ, նրանք պարզել են, որ կանանց 12տոկոսը կամ 47 380 մայրեր երկար հղիություն են ունեցել (այսինքն՝ 41 շաբաթ եւ ավելի), եւ որ PM2.5-ի ազդեցության եւ ջերմային սթրեսի ավելի բարձր մակարդակները, որոնք չափվում են UTCI-ով, մեծացնում են դրա առաջացման հավանականությունը:

Նրանք ուսումնասիրել են նաեւ այլ գործոններ, որոնք կարող են ազդել հղիության տեւողության վրա, ինչպիսին են ծխելը, սոցիալ-տնտեսական վիճակը, ռասայական եւ էթնիկ պատկանելությունը եւ մոր տարիքը:

Առաջնածինները, 35 տարեկանից բարձր կանայք եւ քաղաքային բնակավայրերում ապրողները հատկապես խոցելի էին այս հետեւանքների նկատմամբ: Հետազոտողները նշել են, որ ծայրահեղ ջերմաստիճանի եւ օդի աղտոտվածության ազդեցությունը կարող է տարբեր ձեւերով երկարացնել հղիությունը: Օրինակ, երկու գործոններն էլ կարող են մեծացնել անկայուն մոլեկուլների արտադրությունը, որոնք կոչվում են ռեակտիվ թթվածնի տեսակներ։ Դրանք կարող են խաթարել հորմոնալ ֆունկցիան:

Հետևեք NEWS.am Medicine-ին Facebook-ում և Twitter-ում