Տանը պայմաններում ստացված մեզի անալիզը կարող է հայտնաբերել միզապարկի քաղցկեղի դեպքերի մեծ մասը

Մեզի գենետիկական անալիզը կարող է օգնել հայտնաբերել միզապարկի քաղցկեղի դեպքերի մեծ մասը և փրկել պացիենտներին անհարմար, շտապ հետազոտություններից։ Այս եզրակացությանն են եկել Մեծ Բրիտանիայի NHS հիվանդանոցների հետազոտողները։

Բիրմինգհեմի համալսարանի մասնագետների գլխավորած թիմը փորձարկել է GALEAS թեստը 964 պացիենտի մոտ, որոնց շտապ ուղեգրել էին ուրոլոգի մոտ՝ մեզի մեջ արյան առկայության պատճառով։ Թեստը ճշգրիտ հայտնաբերել է քաղցկեղի 77 դեպքից 71-ը (92.2% ճշգրտություն)։

Բացի այդ, GALEAS-ը 100%-ով հայտնաբերել է մկանային-ինվազիվ քաղցկեղի բոլոր 17 դեպքերը, ինչպես նաև չարորակ ուռուցքների 36 դեպքից 35-ը:

Այս թեստը մեզի մեջ փնտրում է քաղցկեղի հետ կապված գենետիկական փոփոխություններ։ Այն ունակ է 23 գենում ճանաչել ԴՆԹ-ի ավելի քան 450 մուտացիա և որսալ ուռուցքից մեզի մեջ անցնող նյութերը:

Ամենակարևոր ցուցանիշներից մեկը թեստի բարձր ճշգրտությունն է բացասական արդյունքի դեպքում․ եթե թեստը բացասական է, 99.3% հավանականությամբ պացիենտը քաղցկեղ չունի։ Իսկ անտեսանելի հեմատուրիայով պացիենտների մոտ, երբ արյունն անզեն աչքով նկատելի չէ, թեստը հայտնաբերել է քաղցկեղի բոլոր դեպքերը:

Թեստը կարող է կրճատել ցիստոսկոպիաների քանակը

Միզապարկի քաղցկեղն ախտորոշելու համար սովորաբար կիրառում են ցիստոսկոպիա․ միզուկով փոքրիկ տեսախցիկ են մտցնում միզապարկ, որպեսզի ներսից զննեն այն։ Թեև սա արդյունավետ մեթոդ է, այն բավականին անհարմար է պացիենտի համար և ծանրաբեռնում է առողջապահական համակարգը:

Գիտնականները կարծում են, որ մեզի անալիզը կօգնի բժիշկներին հասկանալ, թե ում է իսկապես անհրաժեշտ շտապ ցիստոսկոպիա, իսկ ում դեպքում է հնարավոր այն անվտանգ հետաձգել:

Հետազոտության տվյալներով՝ GALEAS թեստով նախնական ստուգում անցկացնելը կարող է կրճատել շտապ ցիստոսկոպիաների թիվը․ յուրաքանչյուր 1000 պացիենտից մոտ 730-ին հնարավոր կլինի ազատել այդ միջամտությունից:

Սա թույլ կտա թեթևացնել ուրոլոգիական բաժանմունքների ծանրաբեռնվածությունը և կրճատել հերթերը։ Քանի որ մեզի նմուշը հանձնելու համար որևէ միջամտություն պետք չէ, հեռանկարում թեստը կարելի է անել անգամ տանը:

Բիրմինգհեմի համալսարանի պրոֆեսոր և հետազոտության համահեղինակ Ռիչարդ Բրայանը նշել է, որ արդյունքները հաստատում են մեզի մոլեկուլային անալիզի արդյունավետությունը․ այն հստակ ցույց է տալիս, թե որ պացիենտին է անհրաժեշտ շտապ հետազոտություն, իսկ ում մոտ կարելի է սպասել:

GALEAS թեստն արդեն կիրառվում է Անգլիայի և Ուելսի բժշկական կենտրոնների մի մասում, և ցանկն աստիճանաբար ընդլայնվում է:

Այնուամենայնիվ, հետազոտողները ընդգծում են, որ մեզի անալիզը միայն օգնող tool է բժշկի համար և չպետք է մեխանիկորեն փոխարինի ախտորոշման ստանդարտ մեթոդներին։ Հետագա հետազոտությունները կօգնեն մշակել թեստը ստանդարտ բուժօգնության մեջ ներդնելու լավագույն տարբերակը:

Հետևեք NEWS.am Medicine-ին Facebook-ում և Twitter-ում