Արևի լույսը կապված է գլյուկոզայի մակարդակի և դիաբետի ավելի ցածր ռիսկի հետ. Scientific Reports

Արևի լույսի ազդեցությունը կապված է արյան մեջ գլյուկոզայի ավելի ցածր մակարդակի և երկրորդ տեսակի դիաբետի առաջացման ավելի քիչ հավանականության հետ: Այսպիսի եզրահանգման են եկել Մեծ Բրիտանիայի Էդինբուրգի համալսարանի և Շվեդիայի Կարոլինյան ինստիտուտի գիտնականները։ Հետազոտության արդյունքները հրապարակվել են Scientific Reports ամսագրում։

Հետազոտողներն ուսումնասիրել են Մեծ Բրիտանիայի UK Biobank նախագծի մասնակիցների տվյալները, որոնք հավաքվել են 2006-2010 թվականներին: Արևի կարճատև ազդեցությունը գնահատելու համար գիտնականներն օգտագործել են մասնակիցների ապրելու վայրերում արյան նմուշառումից երկու և յոթ օր առաջ ուլտրամանուշակագույն A (UVA) ճառագայթման միջին մակարդակի տվյալները: Երկարատև ազդեցությունը գնահատվել է մասնակիցների կողմից սոլյարիներ այցելության հաճախականության հիման վրա:

Վերլուծությունը բացահայտել է UVA ճառագայթման ազդեցության և գլյուկոզայի մակարդակի միջև հակադարձ կապ: Երկու օրվա ընթացքում արևի միջին ավելի բարձր ազդեցությունը կապված է եղել ձմռանն արյան մեջ շաքարի մակարդակի նվազման հետ: Յոթօրյա ժամանակահատվածը գնահատելիս այդ կապը նկատվել է ձմռանը և գարնանը:

Երկարատև ազդեցության ուսումնասիրությունը ևս բացահայտել է կապ 2-րդ տեսակի դիաբետի ռիսկի հետ: Այն մարդկանց մոտ, ովքեր երբեմն այցելել են սոլյարի, 14 տոկոսով ավելի քիչ է եղել հիվանդությունն ունենալու հավանականությունը, քան նրանց մոտ, ովքեր սոլյարիներ չեն այցելել: Հաճախ այցելողների շրջանում նվազումը կազմել է 22 տոկոս:

Ավելի հաճախ սոլյարի այցելելը կապված է եղել նաև մարմնի զանգվածի ինդեքսի, արյան մեջ գլյուկոզայի և վիտամին D-ի ավելի բարձր մակարդակի հետ: Միևնույն ժամանակ, հետազոտողները նշել են, որ այս արդյունքները միանշանակ չեն նշանակում, թե սոլյարի այցելելը պետք է օգտագործվի դիաբետի կանխարգելման համար: Հետազոտողները ենթադրում են, որ արևի լույսի որոշ ազդեցություններ կարող են կապված լինել վիտամին D-ից տարբեր մեխանիզմների հետ: Ուլտրամանուշակագույն լույսի ազդեցությունը մաշկի մեջ ակտիվացնում է ազոտի օքսիդը, որը կարող է լայնացնել արյան անոթները: Նախորդ հետազոտությունները ևս ցույց են տվել դրա հնարավոր ազդեցությունն արյան հոսքի, ինսուլինի նկատմամբ զգայունության և ինսուլինի սեկրեցիայի վրա։

Հատկապես ուժեղ կապ է նկատվել ձմռանը, երբ շրջակա միջավայրում UVA մակարդակը համեմատաբար ցածր է: Վերլուծությունը ցույց է տվել, որ ցածր ազդեցության դեպքում արևի ներգործության ավելացումը կապված է եղել գլյուկոզայի մակարդակի ամենանկատելի նվազման հետ:

Հետևեք NEWS.am Medicine-ին Facebook-ում և Twitter-ում