Գիտնականները լնդերի հիվանդությունների դեմ ընտրողական ազդեցությամբ մածուկ են ստեղծել

Գիտնականները մշակել են նոր ատամի մածուկ, որն ընդունակ է արդյունավետորեն խոչընդոտել պարոդոնտիտ առաջացնող բակտերիաների աճը՝ միաժամանակ չոչնչացնելով բերանի խոռոչի օգտակար միկրոօրգանիզմները, գրում է Medical Xpress-ը:

Հետազոտությունն անցկացրել են Հալե քաղաքի Ֆրաունհոֆեր ինստիտուտի գերմանացի մասնագետները՝ գիտական այլ գործընկերների հետ համատեղ, իսկ հետագայում տեխնոլոգիան կիրառվել է «PerioTrap Pharmaceuticals GmbH» ստարտափի արտադրանքներում։ Պարոդոնտիտը զարգանում է որոշակի ախտածին բակտերիաների, օրինակ՝ պորֆիրոմոնաս գինգիվալիսի կուտակման հետևանքով, որոնք ամուր պահվում են ատամնափառի մեջ՝ լնդերի եզրագծով, և բորբոքում են հրահրում՝ սկզբում գինգիվիտ, իսկ հետո՝ ատամները շրջապատող հյուսվածքների քրոնիկական հիվանդություն։ Այս բորբոքումը ոչ միայն քայքայում է լինդն ու ոսկրը, այլև կարող է առողջական լուրջ խնդիրներ առաջացնել. բակտերիաներն անցնում են արյան մեջ և կապված են դիաբետի, սիրտ-անոթային հիվանդությունների, արթրիտի և քրոնիկական բորբոքային այլ վիճակների բարձր ռիսկի հետ։

Ավանդական հակասեպտիկ միջոցներն ու ողողումներն իսկապես ոչնչացնում են բազմաթիվ միկրոօրգանիզմներ, սակայն դրանք տարբերություն չեն դնում օգտակար և վնասակար բակտերիաների միջև։ Նման ագրեսիվ ազդեցությունից հետո բերանի խոռոչի միկրոբիոմը հաճախ արագ վերադառնում է անհավասարակշիռ վիճակի, քանի որ ախտածին տեսակներն ավելի արագ են բազմանում, քան օգտակարները։

Նոր ատամի մածուկի հիմքում գուանիդինոէթիլբենզիլամինո-իմիդազոպիրիդին ացետատ ակտիվ նյութն է, որն ընտրողաբար ճնշում է հենց ախտածին բակտերիաներին՝ զրկելով նրանց տոքսիններ արտազատելու կարողությունից, մինչդեռ «լավ» բակտերիաները մնում են կենդանի և կարող են վերականգնել միկրոֆլորայի առողջ հավասարակշռությունը։

Նման ընտրողական ազդեցությունը թույլ է տալիս միկրոբիոմին աստիճանաբար վերադառնալ բնականոն վիճակի՝ առանց ագրեսիվ ախտահանման։

Մշակումն իրականացվել է «Պատշաճ լաբորատոր գործունեության» ստանդարտների խիստ համապատասխանությամբ, ինչը նշանակում է, որ համատեղելիության, անվտանգության և արդյունավետության փորձարկման արդյունքներն արժանացել են կարգավորող մարմինների ճանաչմանը։ Մածուկը պարունակում է նաև սովորական բաղադրիչներ, օրինակ՝ հղկանյութեր՝ մեխանիկական մաքրման համար, և ֆտոր՝ կարիեսը կանխելու համար։

Հետևեք NEWS.am Medicine-ին Facebook-ում և Twitter-ում