Սննդաբանը պատմել է կաթնաշոռի հնարավոր վնասի մասին

Սննդաբան Ռոբ Հոբսոնը հայտարարել է, որ կաթնաշոռը, չնայած իր օգտակար հատկություններին և սպիտակուցի բարձր պարունակությանը, կարող է ունենալ նաև իր բացասական կողմը՝ աղի բարձր պարունակությունը։ Փորձագետը դրա մասին խոսել է The Independent-ին տված հարցազրույցում։

Նա պարզաբանել է, որ արտադրության գործընթացի պատճառով կաթնաշոռը կարող է ավելի շատ նատրիում պարունակել, քան, օրինակ, մածունը, քանի որ աղը ավելացվում է պատրաստման գործընթացում։

Փորձագետը նշել է, որ կաթնաշոռի մեկ ստանդարտ չափաբաժինը մոտավորապես 300-400 միլիգրամ նատրիում է պարունակում։ Այդ քանակը համարվում է անվտանգ առողջ անհատների համար, սակայն նրանց համար, ովքեր պետք է սահմանափակեն աղի ընդունումը, մասնավորապես՝ բարձր արյան ճնշում ունեցողների համար, այն կարող է անցանկալի լինել։

Հոբսոնն ընդգծել է, որ հիպերտոնիայից տառապող մարդիկ անպայման չէ, որ լիովին հրաժարվեն կաթնաշոռից, սակայն սննդակարգը պլանավորելիս անհրաժեշտ է հաշվի առնել աղի մակարդակի պարունակությունը։

Հետևեք NEWS.am Medicine-ին Facebook-ում և Twitter-ում