Ընկույզի թափոնները կարող են պաշտպանել բջիջները բորբոքումից. F&F

Ընկույզի կեղևն ու կանաչ թաղանթը պարունակում են հզոր հակաօքսիդանտներ՝ ֆենոլային միացություններ և կարոտինոիդներ, որոնք կարող են պաշտպանել բջիջները բորբոքումներից և վնասվածքներից։ Նման եզրակացության են եկել Բարսելոնայի համալսարանի գիտնականները։ Հետազոտության արդյունքները հրապարակվել են Food & Function (F&F) ամսագրում։

Հետազոտողները վերլուծել են ընկույզի տարբեր մասերի՝ միջուկի, կեղևի և կանաչ արտաքին թաղանթի քիմիական կազմը։ Պարզվել է, որ բազմաթիվ կենսաակտիվ միացություններ պարունակվում են ոչ միայն ուտելի մասում, այլև այն տարրերում, որոնք սովորաբար դեն են նետվում։

Այսպիսով, պարզվել է, որ կեղևը հատկապես հարուստ է ֆենոլային միացություններով, մասնավորապես՝ էլագաթթվով և կատեխիններով։ Այս նյութերը հայտնի են իրենց հակաօքսիդանտային և հակաբորբոքային հատկություններով, ինչպես նաև նյարդային բջիջների պաշտպանական հատկությունները բարձրացնելու ունակությամբ։

Վերլուծությունը ցույց է տվել, որ չհասունացած ընկույզի կանաչ թաղանթը պարունակում է մեծ քանակությամբ կարոտինոիդներ՝ գունանյութեր, որոնք մասնակցում են բջիջների պաշտպանությանը վնասվածքներից։ Դրանց շարքում առանձնանում է β-կարոտինը, որը կարևոր դեր է խաղում իմունային համակարգի գործունեության մեջ։

Ընկույզի միջուկը միևնույն ժամանակ մնում է վիտամին E-ի գլխավոր աղբյուրը. սա ամենահայտնի բնական հակաօքսիդանտներից մեկն է, որը պաշտպանում է բջիջները ազատ ռադիկալների ներգործությունից։

Աշխատանքի հեղինակների խոսքով՝ ստացված արդյունքները ցույց են տալիս, որ ընկույզի արտադրության թափոնները կարող են գործնական արժեք ունենալ։ Դրանք պոտենցիալ կերպով կարող են օգտագործվել սննդային հավելումների, կոսմետիկ բաղադրիչների և նույնիսկ կենսաքայքայվող փաթեթավորման նյութերի ստեղծման համար։

Գիտնականները նշում են, որ ընկույզի զանգվածի մինչև 70%-ը սովորաբար չի օգտագործվում։ Հետևաբար, կեղևի և թաղանթի վերամշակումը կարող է ոչ միայն կենսաբանորեն ակտիվ նյութերի նոր աղբյուրներ տալ, այլև ընկույզի արտադրությունն ավելի կայուն դարձնել էկոլոգիայի և ռեսուրսների տեսանկյունից։

Հետևեք NEWS.am Medicine-ին Facebook-ում և Twitter-ում