Հնդկաստանում նյարդավիրաբույժները շփոթել են պացիենտներին և դա հասկացել են միայն վիրահատության ժամանակ

Միջադեպը տեղի է ունեցել շաբաթ օրը՝ մարտի 7-ին, Վարանասիի համալսարանական հիվանդանոցին կից վնասվածքաբանության կենտրոնում: Ինչպես հայտնում է *Times of India* թերթը, տարեց կինը մահացել է այն բանից հետո, երբ նրան անհարկի վիրահատության են ենթարկել՝ պացիենտների նույնականացման կոպիտ սխալի պատճառով:

71-ամյա Ռադհիկա Դևին գտնվել է նյարդավիրաբուժության բաժանմունքում և սպասել է պլանային միջամտության, սակայն նրան սխալմամբ տարել են վիրահատարան՝ 82-ամյա Ռադհիկա Սինգհի փոխարեն:

Վիրաբույժները սկսել են աշխատանքը, սակայն ավագ օրդինատորը պացիենտի մոտ չի հայտնաբերել սպասվող կոնքազդրային կոտրվածքը: Դրանից հետո բուժքույրերը հաստատել են, որ տեղի է ունեցել շփոթություն: Բժիշկները մշակել են կատարված կտրվածքները և կնոջը վերադարձրել հիվանդասենյակ՝ առանց հարազատներին տեղյակ պահելու տեղի ունեցածի մասին:

Չորեքշաբթի՝ մարտի 18-ին, Ռադհիկա Դևիին կատարել են ճիշտ վիրահատությունը: Ավելի ուշ նրա մոտ բարդություններ են առաջացել, ինչի հետևանքով կինը մահացել է չորեքշաբթի՝ մարտի 28-ին:

Անփութության փաստը բացահայտվել է այն բանից հետո, երբ մահացածի թոռը բողոք է ներկայացրել բժշկական հաստատության տնօրենին: Դեպքի հետաքննության համար ստեղծվել է հատուկ հանձնաժողով: Ներկայումս փորձագետները ստուգումներ են անցկացնում՝ պարզելու բժշկական անձնակազմի մեղավորության աստիճանը:

Հետևեք NEWS.am Medicine-ին Facebook-ում և Twitter-ում