Դեպք, որը բժիշկներին կանգնեցրել է փակուղու առջև. արյուն էր հոսում առողջ երեխայի աչքերից, ականջներից և քթից

Հնդկաստանում բժիշկները բախվել են վերջին տարիների ամենաառեղծվածային բժշկական դեպքերից մեկին։

Տասնմեկամյա տղայի մոտ հանկարծակի սկսվել է արյուն հոսել աչքերից, քթից և ականջներից, չնայած հետազոտությունները չեն բացահայտել վնասվածքներ, արյան հետ կապված խանգարումներ կամ այլ ֆիզիկական պատճառներ, հաղորդել է Live Science-ը։

Տղայի ծնողները դիմել են բժշկական օգնության համար, երբ տղան մեկ ամիս շարունակ ունեցել է անսովոր արյունահոսության դեպքեր։ Դրանք սկսվել են առանց որևէ ակնհայտ պատճառի, ցավ չեն պարունակել և սովորաբար մի քանի րոպեից դադարել են ինքնաբերաբար։

Զննման ընթացքում բժիշկները սեփական աչքերով նկատել են տղայի աչքերից և ականջներից հոսող արյունը։ Սակայն թեստերի արդյունքները շփոթեցրել են մասնագետներին։ Արյան ցուցիչները նորմալ էին, մակարդելիությունը՝ բնականոն, և հետազոտությունները չեն բացահայտել հյուսվածքային կամ անոթային վնաս։

Լաբորատոր հետազոտությունները հաստատել են, որ հեղուկն իսկապես արյունոտ է եղել։ Բայց թե որտեղից է այն ծագել՝ մնացել է առեղծված։

Ֆիզիկական պատճառը չգտնելուց հետո բժիշկներն ուշադրությունը սևեռել են երեխայի հոգեբանական վիճակի վրա: Ծնողները հայտնել են, որ նոպաներն ավելի հաճախ էին տեղի ունենում ուսումնական ինտենսիվ սթրեսի, հասակակիցների ճնշման և ակադեմիական առաջադիմության նկատմամբ բարձր սպասումների ժամանակահատվածներում:

Հոգեբուժական գնահատումից հետո մասնագետները եզրակացրել են, որ տղան տառապում է չափազանց հազվագյուտ հիվանդությամբ՝ հեմատոհիդրոզով: Սա անսովոր վիճակ է, որի դեպքում սկսում է արյունահոսել մարդու անվնաս մաշկը կամ մարմնի ճեղքվածքները:

Բժշկական գրականության մեջ նկարագրվել է 50-ից պակաս նմանատիպ դեպք:

Հեմատոհիդրոզի ճշգրիտ մեխանիզմը մնում է քննարկման առարկա: Ամենատարածված վարկածներից մեկը ենթադրում է, որ ուժեղ հուզական սթրեսը կարող է վնասել քրտնագեղձերի մոտ գտնվող փոքրիկ արյան անոթները: Արդյունքում՝ արյունն արտահոսում է օրգանիզմի արտազատուկների հետ միասին:

Բուժման համար տղային նշանակվել է պրոպրանոլոլ՝ դեղամիջոց, որը նվազեցնում է օրգանիզմի արձագանքը սթրեսին, ինչպես նաև կոգնիտիվ վարքային թերապիայի կուրս: Նրա ծնողները ևս ստացել են մասնագիտական ​​խորհրդատվություն և առաջարկություններ՝ ուսման հետ կապված ճնշումը նվազեցնելու համար:

Արդյունքները տպավորիչ էին։ Ընդամենը երկու շաբաթ անց նոպաները զգալիորեն պակասել են։ Մեկ ամիս անց նկատվել են միայն մեկուսացված թեթև դրվագներ, իսկ երեք ամիս անց ախտանիշներն ամբողջությամբ անհետացել են առօրյա կյանքի ընթացքում։

Այս դեպքը միակը չէր։ Նախկինում բժիշկները նկարագրել էին նմանատիպ դեպքեր երեխաների մոտ, որոնք ծանր հոգեբանական սթրես են ունեցել դպրոցական աշխատանքների և մեծահասակների բարձր սպասումների պատճառով։ Հատկանշական է, որ հեմատոհիդրոզի բազմաթիվ գրանցված դեպքեր են հայտնաբերվել Հարավային Ասիայի երկրներում, այդ թվում՝ Հնդկաստանում և Պակիստանում։

Գիտնականներն ընդգծել են, որ դեռևս հնարավոր չէ վերջնականապես հաստատել, որ սթրեսն է անմիջականորեն առաջացնում հիվանդությունը։ Այնուամենայնիվ, կուտակվող ապացույցներն ավելի հաճախ են վկայում ծայրահեղ հոգեբանական սթրեսի և այս հազվագյուտ և խորհրդավոր վիճակի միջև սերտ կապի մասին։

Հետևեք NEWS.am Medicine-ին Facebook-ում և Twitter-ում