Տադալաֆիլ դեղամիջոցը 22 տոկոսով բարձրացնում է գլաուկոմայի ռիսկը. BJO

Գիտնականները պարզել են, որ մեծացած շագանակագեղձի ախտանիշների բուժման համար տադալաֆիլի (հայտնի է որպես «սիալիս») երկարատև օգտագործումը կապված է գլաուկոմայի՝ տեսողության կորստի հանգեցնող աչքի վտանգավոր հիվանդության զգալիորեն բարձր ռիսկի հետ։ Հետազոտությունը հրապարակվել է British Journal of Ophthalmology (BJO) ամսագրում։

Տադալաֆիլը լայնորեն օգտագործվում է ոչ միայն էրեկտիլ դիսֆունկցիայի, այլև շագանակագեղձի բարորակ մեծացման դեպքում միզարձակումը հեշտացնելու համար։ Դեղամիջոցը լայնացնում է արյան անոթները, և գիտնականները ենթադրել են, որ դա կարող է նաև ազդել ներակնային ճնշման վրա։

Յուն Սյայի գլխավորությամբ հետազոտողները վերլուծել են 2012-2022 թվականներին 40 տարեկանից բարձր 73 854 տղամարդկանց տվյալները՝ համեմատելով տադալաֆիլ ընդունողներին և չընդունողներին։

Պարզվել է, որ դեղամիջոցն ընդունողների մոտ գլաուկոմայի առաջացման ռիսկը 22 տոկոսով, ներակնային ճնշման բարձրացման ռիսկը՝ 32 և առաջնային բաց անկյունային՝ գլաուկոմայի ամենատարածված ձևի բարձրացման ռիսկը 33 տոկոսով ավելի բարձր է եղել։

«Այս տվյալները տադալաֆիլի ընդունման հակացուցում չեն հանդիսանում, սակայն ընդգծում են բուժումն սկսելուց առաջ աչքի զննման և կանոնավոր մոնիթորինգի կարևորությունը, հատկապես նախկինում գլաուկոմա ունեցող հիվանդների մոտ», - նշել են հեղինակները։

Այլ կերպ ասած՝ սա այս արդյունավետ դեղամիջոցից հրաժարվելու նշան չէ, այլ ակնաբույժի հսկողության տակ գտնվելու անհրաժեշտություն։ Գլաուկոման վտանգավոր է, քանի որ զարգանում է լուռ և կարող է անդառնալիորեն վնասել տեսողական նյարդը նույնիսկ ախտանիշների ի հայտ գալուց առաջ, ինչը վաղ հայտնաբերումը դարձնում է հատկապես կարևոր։ Այս կապի մեխանիզմը դեռևս պարզ չէ. այն կարող է կապված լինել արյան հոսքի և ներակնային ճնշման վրա դեղամիջոցի ազդեցության հետ։

Հետևեք NEWS.am Medicine-ին Facebook-ում և Twitter-ում