Առողջ սննդակարգը նպաստում է ավելի լավ հոտառությանը. Chemical Senses

Մարդիկ, ովքեր հետևում են ավելի առողջ սննդակարգի և ուտում են ավելի շատ բանջարեղեն ու մրգեր, ավելի հազվադեպ են բախվում հոտառության նվազման խնդրին: Նման եզրահանգման են հանգել հետազոտողները, որոնք ուսումնասիրել են Իտալիայում անցկացված լայնամասշտաբ հետազոտության մասնակիցների տվյալները: Արդյունքները հրապարակվել են Chemical Senses բժշկագիտական հանդեսում:

Հետազոտության մեջ օգտագործվել են 44,5 տարեկան միջին տարիքով 6690 չափահասների տվյալներ: Մասնակիցներն անցել են հոտերի ճանաչման 16 կետից բաղկացած թեստ և լրացրել սնուցման վերաբերյալ հարցարաններ: Հոտառության նվազում արձանագրվել է այն դեպքում, երբ անձը ճիշտ է տարբերակել 12-ից ոչ ավելի հոտ:

Հետազոտողները համադրել են թեստերի արդյունքները սննդի որակի մի քանի ցուցանիշների հետ, ներառյալ միջերկրածովյան սննդակարգը և բուսական մթերքների գերակշռությամբ սննդակարգերը: Առողջ սննդակարգի ցուցանիշների մեծ մասի ավելի բարձր գնահատականները կապված են եղել հոտերի ավելի լավ ճանաչման և հիպոսմիայի՝ հոտառության թուլացման ավելի փոքր հավանականության հետ: Հակառակ կապ է դիտվել այն սննդակարգի դեպքում, որն ավելի շատ նվազ օգտակար բուսական մթերքներ է ներառել:

Հոտառության ավելի լավ ցուցանիշները ևս կապված են եղել բանջարեղենի և մրգերի ավելի մեծ սպառման հետ: Ընդ որում, արդյունքները չեն նշանակում, որ առանձին մթերքներն ուղղակիորեն բարելավում են հոտերը տարբերակելու ունակությունը:

Հեղինակները նշում են, որ կապը կարող է երկկողմանի լինել. սնուցումը հնարավորինս ազդում է հոտառական գործառույթի վրա, բայց հենց հոտառությունն ինքնին ունակ է փոխել սննդային նախասիրությունները: Օրինակ՝ մարդը, ով ավելի վատ է զգում հոտերը, կարող է այլ կերպ ընտրել մթերքները և պահանջվող սննդարար նյութերից ավելի քիչ քանակություն ստանալ:

Հետազոտությունը թույլ չի տալիս հաստատել պատճառահետևանքային կապ, քանի որ սնուցման և հոտառության վերաբերյալ տվյալները վերլուծվել են նույն ժամանակահատվածում: Բացի դրանից, սննդակարգը գնահատվել է ըստ մասնակիցների պատասխանների, իսկ թեստը ստուգել է բուն հոտերի ճանաչումը, այլ ոչ թե հոտառական գործառույթի բոլոր ասպեկտները: Արդյունքների հաստատման համար անհրաժեշտ են երկարաժամկետ հետազոտություններ:

Հետևեք NEWS.am Medicine-ին Facebook-ում և Twitter-ում