Ինչպիսի սնունդը կարող է օգնել` կանխելու գրիպով եւ սուր շնչառական վարակներով հիվանդացումը

Ճիշտ սնունդն ամրապնդում է օրգանիզմը եւ նրան օգնում է արդյունավետորեն դիմակայել հիվանդաբեր մանրէներին ու հարուցիչներին:  Սնունդը կարող է օգնել կանխելու ՍՇՎ-ով եւ գրիպով հիվանդացումը: Այդ հարցն այսօր հետաքրքրում է շատ հայերի, որոնք անհանգստանում են վերջին շաբաթներին H1N1 գրիպի ակտիվության պատճառով:

Ինչպես NEWS.am Medicine-ի թղթակցի հետ զրույցում նշել է էնդոկրինոլոգ եւ դիետոլոգ Հասմիկ Աբովյանը, անհնար է գրիպից պաշտպանվել միայն  ճիշտ սննդի միջոցով: Գրիպը հարուցիչային վարակ է, որը փոխանցվում է օդակաթիլային ուղիով եւ դրանից 100 տոկոսանոց պաշտպանություն սկզբունքորեն գոյություն չունի: Վարակման ռիսկը նվազեցնել հնարավոր է գրիպի դեմ պատվաստման միջոցով, որն արվում է մինչեւ գրիպի ակտիվացման սեզոնի սկիզբը   (իդեալականը սեպտեմբեր-հոկտեմբերն է), ինչպես նաեւ կանխարգելիչ այնպիսի միջոցների, ինչպիսիք են ձեռքերը լվանալը, բազմամարդ վայրերում բուժական դիմակներ կրելը եւ այլն:

Իհարկե, դա բոլորովին չի նշանակում, թե սնունդն այդ հարցում ընդհանրապես ոչ մի դեր չի խաղում: Ինչպես նշել է մասնագետը, ճիշտ սննդի միջոցով հնարավոր է ընդհանուր առմամբ ամրապնդել օրգանիզմը, եւ դա հավանաբար որոշակի դեր կխաղա ինչպես մի շարք հիվանդությունների, այնպես էլ դրանց բարդացումների կանխարգելման գործում:  Սակայն նման արդյունքի հասնելու համար անհրաժեշտ է ճիշտ սնվել երկար ժամանակի ընթացքում: Եթե մարդն ամբողջ կյանքում սխալ է սնվել եւ անառողջ կենսակերպ է վարել եւ հանկարծ, գրիպից վախենալով, որոշել է մրգեր եւ բանջարեղեն ուտել, դա նրա համար իհարկե օգտակար կլինի, բայց իմունիտետն ամրապնդելու եւ օրգանիզմն ավելի առողջ դարձնելու համար ժամանակ պետք կլինի, ոչ թե  1-2 օր:

Ճշգրտորեն ինչպիսի՞ սնունդն է օգնում ամրապնդել օրգանիզմը

Մասնագետը խորհուրդ է տալիս ավելի շատ բանջարեղեն եւ միրգ ուտել, ինչպես նաեւ ձուկ եւ ընկուզեղեն: Այդ բոլոր մթերքներն օրգանիզմին  վիտամիններ,  միներալներ եւ հակաօքսիդանտներ են մատակարարում, որոնք ապահովում են բոլոր օրգանների եւ համակարգերի նորմալ աշխատանքը: Խորհուրդ է տրվում նվազեցնել սննդակարգում  ծանր, յուղալի սննդի, քաղցրեղենի, տապակաների եւ վերամշակված մթերքի քանակությունը:  Այդ մթերքներում շատ քիչ են օգտակար նյութերը, փոխարենը շատ են    «դատարկ» կալորիաները, որոնք ծանրաբեռնում են օրգանիզմը եւ նպաստում են ավելորդ քաշի ի հայտ գալուն: 

Ցանկալի է նաեւ օրվա ընթացքում շատ խմել մաքուր ջուր, խորհուրդ է տալիս մասնագետը: 

Ցանկալի է հնարավորինս արագ անցնել առողջ սննդի: Նույնիսկ եթե դա ձեզ չպաշտպանի գրիպով վարակվելուց, երկարաժամկետ հեռանկարում այն ծայրաստիճան օգտակար կլինի ձեր առողջության համար:

Հետևեք NEWS.am Medicine-ին Facebook-ում և Twitter-ում