Կորոնավիրուսը վնասում է ոչ միայն թոքերը, այլ նաեւ` այլ օրգաններ, եւ Լոս Անջելեսի Կալիֆորնիայի համալսարանի գիտնականները դա եւս մեկ անգամ ապացուցել են: Մկների վրա անցկացված փորձարկումների ժամանակ նրանք պարզել են, որ կորոնավիրուսը դադարեցնում է նյութափոխանակության էներգիայի արտադրությունը սրտի, երիկամների եւ փայծաղի բջիջներում: Այս մասին պատմում է JCI Insight- ում հրապարակված հոդվածը:

Նորմալ մկները ընկալունակ չեն SARS-CoV-2 կորոնավիրուսի նկատմամբ, քանի որ վիրուսը չի ճանաչում դրանցում պարունակվող ACE2 սպիտակուցը, որը մարդու օրգանիզմում փոխազդում է S-սպիտակուցի հետ` օգնելով պաթոգենին բջիջ մտնել: Վարակի մեխանիզմի ուսումնասիրության համար գիտնականները գենետիկորեն ձեւափոխված մկներ են բուծել, որոնց տարբեր օրգանների բջիջներում առկա է ACE2-ի մարդկային տարբերակը: Կորոնավիրուսով վարակվելու դեպքում դրանց մոտ թոքաբորբ, ինչպես նաեւ այլ վտանգավոր խանգարումներ են զարգանում:

Յոթ օրվա ընթացքում COVID-19 կորոնավիրուսային վարակով բոլոր մկները դադարեցրել են ուտելն ու ակտիվությունը եւ կորցրել են իրենց քաշի միջինում մոտ 20 տոկոսը: Նրանց մոտ նաեւ իմունային բջիջների մակարդակի փոփոխություններ, սրտի հյուսվածքի այտուցներ եւ փայծաղի դիսֆունկցիա է հայտնաբերվել: Բացի այդ, ճնշվել են էներգիա արտադրող նյութափոխանակության գործընթացները (տրիկարբոքսիլաթթվի ցիկլը եւ շնչառական էլեկտրոնների տեղափոխման շղթան):

Գիտնականները նկատել են, որ COVID-19 մկների բոլոր օրգաններում որոշ փոփոխություններ պահպանվում են երկար ժամանակ: Վիրուսն ի վիճակի է էպիգենետիկ փոփոխություններ առաջացնել, այսինքն` ԴՆԹ-ի կառուցվածքի փոփոխություններ, որոնք ազդում են գեների ակտիվության վրա: