Չինաստանի գիտությունների ակադեմիայի գիտնականների խումբը բացահայտել է մեխանիզմներ, որոնց միջոցով իմունագլոբուլինները մասնակցում են ծերացման պրոցեսին։ Հետազոտությունը հրապարակվել է Cell գիտական ամսագրում։

Իմունագլոբուլինները կամ հակամարմինները պաշտպանիչ սպիտակուցներ են, որոնք իմունային համակարգն արտադրում է վիրուսների, մանրէների, մակաբույծների եւ ալերգենների դեմ պայքարելու համար։

Թիմն ուսումնասիրել է միլիոնավոր տարածական կետեր որձ մկների ինը օրգաններում եւ ստեղծել է գերճշգրիտ տարածական տրանսկրիպտոմային քարտեզներ։ Այդ սխեմաներն օգնել են առարկայացնել բջիջների ավելի քան 70 տեսակների բաշխումը։

Գիտնականները հայտնաբերել են, որ տարածական կառուցվածքային քաոսի ուժեղացումը եւ բջջային ինքնության կորուստը համակարգային ծերացման համընդհանուր նշաններն են։ Այդ փոփոխություններն առաջացնում են ինքնատիպ «բծեր» օրգանիզմի հյուսվածքների վրա։

Գիտնականների խոսքով՝ անսպասելի հայտնագործություն էր այն, որ այդ «բծերը» գոյանում են բջիջների շուրջը, որոնք պատասխանատու են հակամարմինների սինթեզի համար։

Հետազոտությունը նաեւ հայտնաբերել է, որ իմունագլոբուլին G-ն (IgG) կուտակվում է շատ հյուսվածքներում եւ օրգաններում մարդկանց եւ մկների ծերանալու ժամանակ, ինչը ենթադրում է, որ IgG մակարդակները կարող են ծերացման նոր բիոմարկեր ծառայել։

Պարզվել է, որ IgG-ն ուղիղ ծերացում է առաջացնում մարդու եւ մկների մակրոֆագերում եւ միկրոգլիայում՝ ազատ արձակելով բորբոքային գործոններին։ Հետաքրքիր է, որ IgG ներարկումը երիտասարդ մկներին ստիպել է ծերանալ նրանց հյուսվածքներին։

Խումբը մշակել է միջամտության ռազմավարություն հակաիմաստային օլիգոնուկլեոտիդների (ASO) օգտագործմամբ՝ նվազեցնելու համար IgG պարունակությունը մկների հյուսվածքներում՝ դրանով իսկ դանդաղեցնելով շատ օրգանների ծերացումը։