Լոնդոնի Թագավորական քոլեջի բրիտանացի գիտնականները հանգել են եզրակացությանը, որ դեռահասները կարող են օրական երեք ժամից ոչ ավել անցկացնել սոցիալական ցանցերում կամ տեսախաղեր խաղալ՝ առանց իրենց հոգեկանին վնասելու։ Ա​այս ցուցանիշը գերազանցելու դեպքում սթրեսի առաջացման վտանգ գոյություն ունի: Հետազոտությունը հրապարակվել է Journal of Adolescent Health (JAH) բժշկագիտական  հանդեսում:

Գիտնականների թիմը վերլուծել է 3675 երիտասարդների տվյալները, ովքեր իրենց գործունեությունը գրանցել են օրագրերում 14 տարեկանում: 17 տարեկանում նույն խումբը հարցաշարի միջոցով գնահատել է սթրեսի մակարդակը:

Արդյունքները ցույց են տվել, որ այն դեռահասները, ովքեր օրական ավելի քան 180 րոպե են անցկացնում էկրանային ժամանցի վրա, ավելի հաճախ են հակված մինչև 17 տարեկան հասակը տագնապի և ճնշվածության զգացումների:

Հետազոտության արդյունքում պարզվել է նաև, որ տեսախաղեր խաղալու յուրաքանչյուր լրացուցիչ ժամը սթրեսի առաջացման վտանգը ավելացնում է 3%-ով։

Միևնույն ժամանակ ուսումնական նպատակներով սարքավորումների չափավոր (օրական 60-119 րոպե) օգտագործումը նվազեցնում է սթրեսի մակարդակը։

Գիտնականները շեշտել են, որ չափից ավելի կարդալը կարող է վնասել երիտասարդների հոգեկան առողջությանը։ Դեռահասները, ովքեր օրական երեք ժամից ավելի էին ծախսում ընթերցանության վրա, նույնպես ավելացել են սթրեսը: Դա, ամենայն հավանականությամբ, պայմանավորված է մեկուսացմամբ կամ էլեկտրոնային ընթերցման սարքերի օգտագործմամբ:

Հետազոտությունն ընդգծում է, որ բուն էկրանի օգտագործումը այնքան չի ազդում դեռահասների հոգեկան առողջության վրա, որքան դրա համատեքստը: Հանգստի և ուսումնառության նկատմամբ հավասարակշռված մոտեցումը կարող է օգնել նվազեցնել սթրեսի ենթարկվելու ռիսկերը և բարելավել կյանքի որակը, նշել են հայտնագործության հեղինակները։