նախընտրելի դարձնել
Կլինիկական հետազոտություններն արդեն վաղուց կենտրոնացած են իմունային համակարգի աշխատանքն օգտագործելու վրա:
Գիտնականներն օգտագործել են իմունային համակարգի մասին իրենց գիտելիքները՝ հիվանդությունների բուժման մեթոդներ ստեղծելու կամ դրանք կանխարգելելու համար:
Այժմ Փենսիլվանիայի համալսարանի ատամնաբուժական դպրոցի գիտնականները և նրանց միջազգային գործընկերներն ուսումնասիրել են բնածին իմունային համակարգը մարզելու ազդեցությունը երկու քրոնիկ բորբոքային հիվանդությունների՝ պարոդոնտիտի և արթրիտի փորձարարական մոդելներում:
Նրանք պարզել են, որ «մարզված» իմունիտետը (TRIM) այս մոդելներում հանգեցրել է ոսկրային զանգվածի կորստի մեծացմանը:
Հետազոտության արդյունքները հրապարակվել են Development Cell ամսագրում: Նախորդ մոտեցումները հիմնականում վերաբերել են հարմարվողական իմունային համակարգին՝ իմունային համակարգի այն ճյուղը, որը «հիշում է» նախկին սպառնալիքները և սկսում հարձակումը, երբ նորից հանդիպում է դրանց:
Օրգանիզմում կա նաև բնածին իմունային համակարգի բաժին, որը երկար ժամանակ համարվում էր պարզապես առաջին գծի իմունային համակարգի ենթաբաժին, որը պատասխանատու է ընդհանուր հարձակման համար, անկարող է հիշել նախորդ հարձակումները կամ այլ կերպ արձագանքել, երբ նորից մարտահրավեր նետվի:
Այս համոզմունքը վիճարկվել է վերջին տասնամյակի ընթացքում, ասում են հետազոտության հեղինակները:
Հետազոտությունները ցույց են տվել, որ բնածին իմունային համակարգը կարող է ավելի արդյունավետ արձագանքել նույն կամ այլ գրգռիչների կրկնվող ազդեցությանը, այլ կերպ ասած՝ այն կարելի է «մարզել»: Եվ, որ կարևոր է, այս ուսումնասիրությունները նաև ցույց են տվել, որ բնածին իմունային համակարգի «մարզումը» բարերար ազդեցություն է առաջացնում, ինչպիսիք են որոշ փորձարարական մոդելներում հակաուռուցքային ակտիվությունը և վարակների դեմ պայքարում ուժեղացած արձագանքը:
Բայց բորբոքումը` բնածին իմունային համակարգի բնական արձագանքը վնասակար գրգռիչներին, կարող է նաև խորացնել ախտանիշները կամ անգամ հիվանդություն առաջացնել, ինչը վկայում է բուժման իմունոթերապևտիկ մեթոդների ստեղծման դեպքում իմունային համակարգի ավելի լավ ըմբռնման անհրաժեշտությունը:
«Մարզված բնածին իմունիտետը (TRIM) դարձավ հիմնական իմունոլոգիական սկզբունքը, որը մարտահրավեր է նետում այն դոգմային, որ հիշողությունը հատուկ է միայն հարմարվողական իմունիտետին: Այսպիսով, անհրաժեշտ է TRIM-ի ավելի լավ պատկերացում ունենալ՝ մարդու հիվանդությունների բուժման համար այն ճիշտ օգտագործելու համար»,- նշել են գիտնականները:
Հետազոտության ընթացքում հետազոտողները TRIM-ը խթանեցին β-գլյուկանի միջոցով, միացություն, որը պարունակվում է որոշ սնկերում, և չափեցին օստեոկլաստների ձևավորումը, որոնք բորբոքային պարոդոնտիտի և արթրիտի մոդելներում ներծծում են ոսկորները աճի և ապաքինման ընթացքում:
Օստեոկլաստները ողնաշարավորների հսկա բազմամիջուկ բջիջներ են, որոնք վերացնում են ոսկրային հյուսվածքը՝ հանքային բաղադրիչի լուծման և կոլագենի քայքայման ճանապարհով:
«Այսպիսով, թեև TRIM-ը կարող է ունենալ օգտակար ազդեցություն՝ պաշտպանելով վարակներից և քաղցկեղից, սակայն մեր արդյունքները ցույց են տալիս, որ նախորդ վարակի մասին հիշողությունը կարող է նաև նպաստել բորբոքային հիվանդությունների և ոսկրային զանգվածի կորստի հետ կապված բորբոքային խանգարումներով ուղեկցվող պաթոլոգիայի առաջացմանը», - ավելացրել են նրանք:
