ԱՄՆ Յեյլի համալսարանի և Ճապոնիայի Օսակայի համալսարանի գիտնականների միջազգային թիմը հայտնաբերել է բնական կենսաբանական մեխանիզմ, որը կարող է արգելափակել ձվաբջիջի և արական սերմնաբջիջի փոխազդեցությունը և կանխել բեղմնավորումը: Հետազոտությունը հրապարակվել է Proceedings of the National Academy of Sciences (PNAS) բժշկագիտական  հանդեսում:

Հայտնի է, որ պտղաբերության խանգարումների պատճառներից մեկը պայմանավորված է արական և իգական սեռական բջիջների ճանաչման և միաձուլման ձախողմամբ: Այս գործընթացում առանցքային դեր են խաղում IZUMO1 սպիտակուցը արական սերմնաբջիջի մակերեսի և JUNO ընկալիչը ձվաբջիջի վրա:

Նոր հետազոտության ընթացքում գիտնականները հետազոտել են 40 տարի առաջ հայտնաբերված OBF13 հակամարմինը: Պարզվել է, որ այն ընդունակ է արգելափակել բեղմնավորումը՝ կապվելով IZUMO1 սպիտակուցին։

Հետազոտողները ռենտգենյան բյուրեղագրության միջոցով պարզել են, թե ինչպես է OBF13-ը փոխազդում IZUMO1-ի հետ: Պարզվել է, որ հակամարմինը փոխում է սպիտակուցի կառուցվածքը՝ թույլ չտալով այն կապել JUNO ընկալիչին։ Հայտնաբերվել է նաև OBF13-ի բարձր հարակից տարբերակ, որն էլ ավելի արդյունավետ է բեղմնավորումն արգելափակելու համար:

Բացի դրանից, թիմը հայտնաբերել է JUNO ընկալիչի ամինաթթուների հիմնական հատվածները, որոնք պատասխանատու են IZUMO1-ի հետ կապվելու համար: Բացահայտումը պատկերացում է տալիս նրա մասին, թե ինչպես կարելի է շրջանցել հակամարմինների արգելափակումը և վերականգնել բեղմնավորման գործընթացը:

Գիտնականները նախատեսում են շարունակել այս մեխանիզմը հետազոտումը՝ ինչպես անպտղության բուժման, այնպես էլ հակաբեղմնավորման համար անվտանգ և արդյունավետ եղանակներ ստեղծելու ուղղությամբ։