նախընտրելի դարձնել
Ռուս գիտնականները ներկայացրել են հակաբիոտիկի նոր դաս, որը կարող է հաղթահարել մետիցիլինի նկատմամբ կայուն ոսկեգույն ստաֆիլոկոկը, գրել է «Научная Россия» պորտալը։
Այս բակտերիան հիվանդանոցային վարակների հիմնական աղբյուրներից մեկն է, որը կապված է մահացության աճի, հիվանդանոցում մնալու երկարության եւ բուժման բարձր ծախսերի հետ: Հոդվածը հրապարակվել է հեղինակավոր International Journal of Molecular Sciences գիտական ամսագրում։
Ոսկեգույն ստաֆիլոկոկը (Staphylococcus aureus) բակտերիա է, որը կարող է առաջացնել մի շարք հիվանդություններ, ներառյալ մաշկի վարակները, թոքաբորբը, արյան հոսքի վարակները եւ այլ լուրջ հիվանդություններ: Staphylococcus aureus-ի ինֆեկցիաների բուժումը ավելի դժվար է դառնում՝ կապված դիմացկուն շտամների առաջացման հետ, ինչպիսին է մետիցիլինի նկատմամբ կայուն ոսկեգույն ստաֆիլոկոկը (MRSA):
Բակտերիաների դիմադրությունը հակաբիոտիկների նկատմամբ լուրջ խնդիր է: 2019թ. այն կապված էր 4,95 միլիոն մահվան հետ։ Մինչեւ 2050թ., ըստ տարբեր գնահատականների, այդ խնդիրը կարող է հանգեցնել համաշխարհային համախառն ներքին արդյունքի մինչեւ 3,8 տոկոսի կորստի:
Մոսկվայի ֆիզիկատեխնիկական ինստիտուտի, Կուրչատովի ինստիտուտի, Սեչենովի համալսարանի եւ Ռուսաստանի գիտությունների ակադեմիայի ռուս գիտնականները նյութեր են մշակում, որոնք կարող են լուծել այս խնդիրը:
MRSA վարակի բուժման համար առաջարկվող հակաբիոտիկները ներառում են վանկոմիցինը, լինեզոլիդը, կլինդամիցինը, դապտոմիցինը, ցեֆտարոլինը եւ տրիմետոպրիմ սուլֆամետոկսազոլը: Սակայն այս դեղամիջոցներից շատերը կորցնում են իրենց կլինիկական արդյունավետությունը բակտերիաների դիմադրության առաջացման պատճառով: Հետազոտության հեղինակների կարծիքով՝ մշակվող հակաբիոտիկների մեջ երկու ֆունկցիոնալ խմբերի առկայությունը հուշում է գործողության հիբրիդային մեխանիզմի մասին, որի շնորհիվ նրանք արդյունավետորեն հաղթահարում են բակտերիաների դիմադրողականությունը։
«Հետազոտությունն իրականացվել է երկու տարի: Այս հոդվածում մենք նկարագրում ենք բարձր ակտիվությամբ 22 տրիազենոինդոլների օրիգինալ գրադարանի սինթեզը բազմադեղորայքակայուն մետիցիլինի նկատմամբ կայուն ոսկեգույն ստաֆիլոկոկի կլինիկական մեկուսացումների լայն սպեկտրի դեմ: Առաջատար միացությունը՝ BX-SI043 (էթիլ 6-ֆտորո-3-[պիրոլիդին-1-իլ-ազո]-1H-ինդոլ-2-կարբոքսիլատ), ցույց է տվել բարձր ակտիվություն (նվազագույն արգելակող խտության միջակայք 0,125-0,5 մգ/լ) MRSA-ի 41 կլինիկական իզոլյատի եւ in vitro ցիտոքսիկություն եւ in vivo առնետներին ներաղեստամոքսային ներարկման դեպքում»,- նշել է աշխատանքի հեղինակներից մեկը՝ Ֆիզիկատեխնիկական ինստիտուտի կենսաբանական եւ բժշկական ֆիզիկայի Ֆիզտեխդպրոցի տնօրեն Դենիս Կուզմինը:
Դեղամիջոցի թեկնածու համարվող BX-SI043-ը լավ արդյունքներ է ցույց տվել ինչպես բջիջների, այնպես էլ կենդանիների թունաբանական թեստերում: Ի լրումն ուժեղ հակաբակտերիալ ակտիվության, այն ցույց է տվել բարձր ընտրողականության ինդեքս, ինչը նշանակում է, որ հակաբիոտիկը ազդում է հատուկ բակտերիալ բջիջների վրա եւ քիչ թունավոր է կենդանիների եւ մարդկանց բջիջների համար: Հետազոտությունը ցույց է տվել, որ տրիազենոիդոլները կարող են խոստումնալից հարթակ հանդիսանալ գրամ-դրական բակտերիաների, մասնավորապես՝ մետիցիլինի դիմացկուն Staphylococcus aureus-ի դեմ արդյունավետ հակաբիոտիկների մշակման համար եւ կարող են օգտագործվել մաշկային վարակների լայն շրջանակի բուժման նպատակով:
