Բջջային հեռախոսների երկարատև օգտագործումը և նստակյաց կենսակերպը կարող են զգալիորեն մեծացնել պարանոցի ցավի զարգացման վտանգը։ Նման եզրակացությանն են հանգել չինացի գիտնականները։ Արդյունքները հրապարակվել են BMC Public Health բժշկագիտական  հանդեսում։

Գիտնականները վերլուծել են արգանդի վզիկի ցավի համախտանիշի գործոններին նվիրված 25 նախկինում հրապարակված ուսումնասիրությունների տվյալները։ Հետազոտությունում ընդգրկվել է ավելի քան 43 հազար մարդ՝ աշխարհի 13 երկրներից։

Պարզվել է՝ ամենամեծ վտանգը բխում է սմարթֆոնների օգտագործումից. իրենց հեռախոսներով շատ ժամանակ են անցկացնողները պարանոցի ցավի 82%-ով ավելի բարձր ռիսկի են ենթակա, քան նրանք, ովքեր այդ սարքերն ավելի հազվադեպ են օգտագործում։ Համակարգչի առջև աշխատելը 23%-ով մեծացնում է վտանգը, մինչդեռ հեռուստացույց դիտելը էական ազդեցություն չի թողնում։

Հետազոտությունը պարզել է նաև, որ երկար ժամանակ նստած մնալը բացասական ազդեցություն ունի առողջության վրա։ Օրական չորս ժամ նստելը 45%-ով մեծացնում է պարանոցի ցավի առաջացման վտանգը, իսկ վեց ժամից ավելի նստելը՝ գրեթե 88%-ով։

Հեղինակների կարծիքով, էլեկտրոնային սարքերի հետ աշխատելիս պարանոցի երկարատև ծալումը և կռանալը չափազանց ծանրաբեռնվածություն են առաջացնում պարանոցային ողնաշարի և մեջքի վերին հատվածի վրա։ Սակայն նման խնդիրների հաճախականության աճը կապված է ոչ միայն գաջեթների մասսայականացման, այլև համավարակից հետո աշխարհի բնակչության կենսակերպի գլոբալ փոփոխությունների հետ։