Կալիֆոռնիայում ավելի քան 160 մարդ է վարակվել սալմոնելայով՝ ըստ Հիվանդությունների վերահսկման և կանխարգելման կենտրոնների (CDC) «Հիվանդացության և մահացության շաբաթական հաշվետվության» նոր թողարկման։ Վարակման պատճառը եղել է հում (չպաստերիզացված) կաթնամթերքը, որը արտադրվել է մեկ կոնկրետ կաթնամթերքի ֆերմայի կողմից։

CDC-ի տվյալներով՝ բռնկումը շարունակվել է 2023 թվականի սեպտեմբերից մինչև 2024 թվականի մարտը։ Առաջին դեպքերը գրանցվել են այն բանից հետո, երբ Կալիֆոռնիայում ինը մարդ հաղորդել է սննդային թունավորման մասին՝ օգտագործելով հում կաթի որոշակի ապրանքանիշի արտադրանք։

Հաշվետվության հեղինակների խոսքով՝ սա ԱՄՆ-ում վերջին տարիներին գրանցված սալմոնելյոզի ամենախոշոր բռնկումներից մեկն է, որն առաջացել է հում կաթի օգտագործման արդյունքում։ Համեմատության համար՝ 2009-ից մինչև 2021 թվականը ԱՄՆ-ում գրանցվել է 16 նմանատիպ դեպք, սակայն դրանցից յուրաքանչյուրն ընդգրկել է ընդամենը 2-ից 33 մարդու։

Թեև այն ֆերմայի անունը, որը դարձել է վարակման աղբյուր՝ չի նշվում, սակայն հաշվետվության մեջ հատկապես ընդգծվում է կանոնավոր սանիտարական ստուգումների կարևորությունը, ինչպես նաև սպառողների իրազեկվածությունը հում կաթի օգտագործման ռիսկերի մասին։ Այդ կաթը չի անցնում պաստերիզացման գործընթաց, ինչի հետևանքով կարող է պարունակել վտանգավոր բակտերիաներ, այդ թվում՝ Salmonella, E. coli և Listeria։