Հոլանդացի գիտնականները պարզել են, որ գարեջրի սիրահարները 35%-ով ավելի գրավիչ են դառնում մոծակների համար։ Ուսումնասիրության արդյունքները հրապարակվել են bioRxiv նախնական տպագրության ծառայությունում։

Փորձը տեղի է ունեցել անսովոր պայմաններում՝ անմիջապես Lowlands երաժշտական փառատոնի ժամանակ, որտեղ Ռադբաուդի համալսարանի հետազոտողները շարժական լաբորատորիա էին տեղադրել։

Հետազոտությանը մասնակցել է մոտ 500 կամավոր։ Նախ, մասնակիցները լրացրել են սննդակարգի, հիգիենայի և կենսակերպի մասին հարցաթերթիկներ, որից հետո ձեռքը դրել են միջատներով լցված հատուկ թափանցիկ խցիկի մեջ։ Մոծակները չեն կարողացել կծել, սակայն արձագանքել են մաշկի հոտին։ Խցիկի պատերին տեղադրված տեսախցիկները գրանցել են միջատների հետաքրքրության աստիճանը։

Հետազոտության արդյունքները ցույց են տվել, որ գարեջրասերները մոծակների համար մոտ 35%-ով ավելի գրավիչ են դառնում։ Միջատների ուշադրությունը գրավում էին նաև նրանք, ովքեր նախորդ օրը զուգընկերոջ հետ գիշեր էին անցկացրել։ Ընդհակառակը, վերջերս ցնցուղ ընդունելը և արևապաշտպան քսուք օգտագործելը նվազեցրել են թիրախ դառնալու հավանականությունը։

Գիտնականների խոսքով՝ մոծակները կողմնորոշվում են ոչ միայն ածխաթթու գազի և ջերմության, այլև մաշկի քիմիական ազդանշանների միջոցով, որոնք փոփոխվում են մարդու սովորությունների ազդեցությամբ։ Այս տվյալներն օգնում են բացատրել, թե ինչու են որոշ մարդիկ միջատների համար իսկական «մագնիս» դառնում, իսկ մյուսները գրեթե չեն տուժում խայթոցներից։

Հետազոտության հեղինակները շեշտում են, որ մոծակները վտանգավոր վարակների, այդ թվում՝ մալարիայի և Դենգեի տենդի, փոխանցողներ են։ Այդ իսկ պատճառով, նույնիսկ պարզ միջոցառումները՝ սկսած կանոնավոր ցնցուղից և արևապաշտպան քսուքից մինչև ալկոհոլի չափավոր օգտագործում, կարող են լրացուցիչ պաշտպանություն դառնալ առողջության համար։