Շանդունի ավանդական չինական բժշկության համալսարանի հետազոտության համաձայն՝ սննդակարգը կարող է զգալի ազդեցություն ունենալ քնի վրա։ Frontiers in Nutrition ամսագրում հրապարակված աշխատանքը ցույց է տվել, որ սննդային որոշակի սովորությունները կապված են ավելի առողջ քնի հետ։

Հետազոտությանը մասնակցել է 1497 մարդ, ովքեր մանրամասն հարցաթերթիկ են լրացրել սննդի վերաբերյալ։ Գիտնականները գնահատել են մթերքների 12 խմբերի սպառումը, այդ թվում՝ բանջարեղենի, մրգերի, մսի, հացահատիկի և կաթնամթերքի խմբերը, և առանձնացրել են սննդակարգի մի քանի տիպիկ մոդելներ։ Քնի որակը չափվել է Պիտսբուրգի քնի որակի ինդեքսի (PSQI) օգնությամբ, որը հաշվի է առնում քնի տևողությունը, քնելու հետ կապված դժվարությունները, գիշերային արթնացումները և վերականգնման ընդհանուր զգացողությունը։

Վերլուծությունը ցույց է տվել, որ սննդակարգի միայն մեկ մոդել է կապված եղել քնի բարելավման հետ. այն մարդիկ, ովքեր կանոնավոր կերպով օգտագործել են թարմ մրգեր, բանջարեղեն և կաթնամթերք, ավելի հազվադեպ են դժգոհել անքնությունից և վատ հանգստից։ Որքան բարձր է սննդակարգում այս մթերքների մասնաբաժինը, այնքան ցածր է քնի հետ կապված խնդիրների հավանականությունը։

Գիտնականները նշում են, որ հետազոտությունը չի ապացուցում ուղղակի պատճառահետևանքային կապ, սակայն արդյունքները մատնանշում են, որ առողջ սնունդը կարևոր նշանակություն ունի առողջ քնի ապահովման համար։