Երեխային կրծքով կերակրելը կարող է երկարաժամկետ ազդեցություն ունենալ մոր քաշի վրա, նման եզրակացության են հանգել Օսլոյի համալսարանի գիտնականները նոր հետազոտության արդյունքում: Առնվազն երեք ամիս երեխային կրծքով կերակրող կանայք՝ ավելի քիչ կրծքով կերակրող կանանց համեմատ, իրենց կյանքի ընթացքում միջինում մինչև 6,5 կիլոգրամով պակաս են ավելացնում քաշը:

Նախորդ հետազոտությունները հիմնականում հետազոտել են քաշի փոփոխությունները ծննդաբերությունից հետո առաջին մեկ-երկու տարվա ընթացքում: Նոր հետազոտությունը տասնամյակներ շարունակ, մինչև 50 տարեկանը հետևել է կանանց՝ կրծքով կերակրման ավարտից հետո, և միաժամանակ նպատակ ուներ հետազոտել մայրերի շրջանում սրտանոթային հիվանդությունների վտանգը:

Գիտնականները վերլուծել են Women and Health Study («Կանայք և առողջությունը») հետազոտության տվյալները, որին Նորվեգիայում մասնակցել են ավելի քան 170 հազար կանայք: Քաշի ամենամեծ տարբերությունը նկատվել է հղիությունից առաջ ավելորդ քաշից կամ ճարպակալումից տառապող կանանց շրջանում: Այդ խմբում կանայք, որոնք յուրաքանչյուր երեխային կրծքով կերակրել են երեքից տասնհինգ ամիս շարունակ, փոքր տարիքից մինչև միջին տարիքը միջինում 6,5 կիլոգրամով պակաս են քաշ ավելացրել, քան նրանք, որոնք ավելի քիչ են կրծքով կերակրել:   

Հղիությունից առաջ նորմալ քաշ ունեցող կանանց շրջանում երեքից տասնհինգ ամիս կրծքով կերակրումը հանգեցրել է մինչև 3 կիլոգրամ քաշի կորստի: Քաշի պակաս ունեցող կանանց շրջանում քաշի վրա երկարատև ազդեցությունն աննշան է եղել։

Կրծքով կերակրման շնորհիվ կանայք ավելի շատ են էներգիայի ծախսում, ինչը կարող է նպաստել քաշի կորստին, թեև որոշ կանանց շրջանում կրծքով կերակրումը կարող է միաժամանակ նպաստել ախորժակի բարձրացմանը: Պատմական տվյալները վկայում են, որ առավել մեծ ազդեցություն է նկատվել 1980 թվականից հետո ծննդաբերած կանանց շրջանում, ինչն ավելի մոտ է ժամանակակից կրծքով կերակրման վարժվածությանը։

Նորվեգական ուղեցույցները խորհուրդ են տալիս մասնակի կրծքով կերակրում առնվազն մեկ տարի, եթե դա հարմար է և՛ մոր, և՛ երեխայի համար: Հետազոտությունն ընդգծում է կրծքով կերակրման աջակցության կարևորությունը՝ երկարաժամկետ առողջության արդյունքները բարելավելու առումով, հատկապես ավելորդ քաշից կամ ճարպակալումից տառապող կանանց համար: