Հետազոտությամբ պարզվել է, որ ճարպերի ցածր բաղադրությամբ սննդակարգը կարող է խիստ օգտակար գտնվել՝ էստրոգեն ընկալիչ-բացասական հիվանդությամբ ախտորոշված՝ զարգացման վաղ փուլի կրծքագեղձի քաղցկեղ ունեցող կանանց համար: Ճարպերից  աղքատ դիետա սահմանելով՝ վերջիններս կարող են ախտորոշման պահից հետո՝ 15 տարիների ընթացքում ցանկացած պատճառով մահանալու ռիսկի՝ 36 տոկոսի չափով նվազեցման հասնել: Վերը հիշատակված եզրահանգման մասին Լոս Անջելեսի կենսաբժշկական հետազոտությունների ինստիտուտի օնկոլոգ դոկտոր Ռովան Չլեբովսկին է հայտնել:

Նրա խոսքով, հետազոտության ընթացքում մահացության ռիսկի ամենանշանակալի կրճատումը միաժամանակ էստրոգեն եւ պրոգեստերոն ընկալիչ-բացասական հիվանդություններով ախտորոշված մասնակիցների մոտ է նկատվել: Ախտորոշումը ստանալուց հետո՝ 5 տարիների ընթացքում ճարպերի ցածր բաղադրությամբ սննդակարգի հետեւելու պարագայում հետագա 15 տարիներին նրանց մոտ ցանկացած պատճառով մահացության ռիսկի՝ 56 տոկոսի չափով կրճատում է նկատվել, հաղորդում է NewsMax Health-ը:

Հետազոտության մասնակիցները ճարպերի օրական սպառման ծավալները միջին ցուցանիշից՝ 29 տոկոսից ընդամենը 20-ի են հասցրել:

Դոկտոր Չլեբովսկին մտադիր է հետազոտության արդյունքները առաջիկա օրերին Սան-Անտոնիայում կայանալիք կրծքագեղձի քաղցկեղի թեմայով գիտաժողովին ներկայացնել: Նմանատիպ միջոցառումներին ներկայացված տվյալները նախնական են համարվում՝ նախքան որեւէ գրախոսվող ամսագրում հրապարակվելը:

Վերը հիշատակված եզրահանգման համար հիմք ծառայած ուսումնասիրությունն ավելի քան 2400՝ 48-79 տարեկան կանանց շրջանում ե իրականացվել: Ընդ որում, նրանցից գրեթե 1600-ի մոտ միայն էստրոգեն ընկալիչ-բացասական հիվանդություն է ախտորոշվել, իսկ մնացած 800-ի պարագայում՝ նաեւ պրոգեստերոն ընկալիչ-բացասական հիվանդություն: Բոլոր մասնակիցները զարգացման վաղ փուլի կրծքագեղձի քաղցկեղ են ունեցել եւ համապատասխան բուժում ստացել՝ 1994-2001թթ.-ի ընթացքում:

Կանանց շուրջ 50 տոկոսին ճարպերի ցածր բաղադրությամբ սննդակարգ է նշանակվել եւ պարբերական խորհրդատվություն տրամադրվել՝ ի տարբերություն համեմատական խմբում ընդգրկվածների, որոնց առջեւ որեւէ պահանջ չի դրվել:

Առաջին խմբում ընդգրկված կանանց մոտ ճարպերի կլանման մակարդակի կրճատումը նաեւ սննդակարգի ընդհանուր կալորիականության՝ 10 տոկոսի եւ մարմնի կշռի՝ 2,7 կգ-ի չափով նվազեցման է հանգեցրել, տեղեկացնում են հետազոտության հեղինակները: 

Բացի այդ, երկու խմբերում գրանցված արդյունքների համեմատական վերլուծությունը ցույց է տվել, որ անկախ քաղցկեղի տեսակից, ճարպերի ցածր բաղադրությամբ սննդակարգի հետեւող կանանց մոտ, ի համեմատություն ազատ սնվողների,  մի փոքր՝ ոչ նշանակալիորեն ցածր մահացության ցուցանիշ է նկատվում՝ 14 տոկոսը՝ 17-ի դիմաց:

Ճարպերից աղքատ սննդակարգի առավել նշանակալի ազդեցությունը քաղցկեղի ոչ հորմոնային տիպերով՝ էստրոգեն եւ պրոգեստերոն ընկալիչ-բացասական հիվանդություններով, կամ միայն առաջինով ախտորոշված մասնակիցների շրջանում է նկատվել: Ընդ որում, հետազոտության հեղինակները ցանկացած պատճառով մահվան դեպքերն են արձանագրել: Այնպես որ չի կարելի ասել, թե ճարպերի ցածր բաղադրությամբ դիետան ուղղակիորեն կրծքագեղձի քաղցկեղից մահացությունն է նվազեցնում, ընդգծել է դոկտոր Չլեբովսկին:

Փորձագետը բացատրություն չունի հարցին, թե ինչու է ճարպերից աղքատ դիետան այդչափ օգտակարություն դրսեւորում: Նրա միակ վարկածն այն է, որ առաջարկվող միջոցը մարմնի հավելյալ քաշի կորստի եւ դրանում առկա բորբոքումների ծավալի կրճատման կարող է հանգեցնել, ինչը քաղցկեղի աճը դանդաղեցնելու միտում ունի: Դոկտոր Չլեբովսկիի համար պարզ չէ նաեւ, թե ինչու է սննդակարգի ազդեցությունը հատկապես էստրոգեն ընկալիչ-բացասական հիվանդությամբ ախտորոշված կանանց շրջանում նկատելի:  

Դոկտոր Դեյվիդ Հեբերը՝ Քալիֆորնիական համալսարանից, ընդգծել է, որ սա առաջին դեպքն է, երբ հետազոտության շրջանակում ճարպերի ցածր բաղադրությամբ սննդակարգի՝ կրծքագեղձի քաղցկեղով ախտորոշված կանանց նկատմամբ երկարաժամկետ ազդեցությունն է ուսումնասիրվում: Հենվելով ընթացիկ եւ այլ՝ նախընթաց հետազոտությունների արդյունքում ստացված տվյալների վրա, մասնագետը կրծքագեղձի քաղցկեղով ախտորոշված կանանց խորհուրդ է տալիս ճարպերի հաշվին ընդհանուր կալորիականության՝ 20-25 տոկոսի չափով կրճատում նախաձեռնել եւ միայն առողջարար ճարպեր, մասնավորապես ձկնեղենի, օրինակ՝ սաղմոնի ու մի շարք այլ սննդատեսակների բաղադրիչը հանդիսացող օմեգա-3 ճարպաթթուներ ընդունել: