Բժիշկները հաճախ են խոսում այն խնդիրների մասին, որոնք կարող են զարգանալ քաղցր գազավորված ըմպելիքների, ինչպես օրինակ՝ Coca-Cola-ի օգտագործումից հետո, բայց քչերն են պատկերացնում, թե ինչ է տեղի ունենում օրգանիզմում մի թիթեղյա տարայի չափով կոլա խմելուց հետո։ Դեղագետ Նիրաժ Նայքը բացատրում է, թե գազավորված ըմպելիքներն ինչպես են ազդում օրգանիզմի վրա․

Առաջին 10 րոպե

Օրգանիզմ է ընկնում 10 գդալ շաքար։ Դա շաքարի առավելագույն քանակն է, որը կարելի է ընդունել մեկ օրվա ընթացքում։ Շաքարի նման քանակ ընդունելուց հետո մենք սրտխառնոց և փսխումներ չենք ունենում այն պատճառով միայն, որ նման ըմպելիքներում առկա ֆոսֆորային թթուն չեզոքացնում է քաղցր համը և այն պակաս հագեցնող է դարձնում։

20 րոպե

 Արյան մեջ շաքարի մակարդակը կտրուկ բարձրանում է, և օրգանիզմը սկսում է ինսուլին արտադրել։ Լյարդն անմիջապես միանում է գործընթացին և սկսում է ստացված ամբողջ շաքարը ճարպի վերածել։

40 րոպե

Օրգանիզմն արդեն ներծծել է կոֆեինը, և կարող է զգալ նրա ազդեցությունը․ բիբերը լայնանում են, ճնշումը բարձրանում է։ Ուղեղում ադենոզինի ռեցեպտորներն արգելափակվում են, և քնատությունն անցնում է։

45 րոպե

Օրգանիզմում սկսում է դոպամին արտադրվել, ուղեղում խթանվում են հաճույքի կենտրոնները։ Հերոինը ճիշտ նույն կերպ է ազդում մեզ վրա։

60 րոպե

Ֆոսֆորաթթուն  աղիքներում իրար է կապում կալցիումի, մագնիումի  և ցինկի մոլեկուլները։ Արհեստական արոմատիզատորները մեզի հետ միասին շատ կալցիում են դուրս բերում օրգանիզմից։

Դրանից հետո․․․

Կոֆեինը ազդում է միզամուղի նման, դրա համար էլ շատ շուտով զուգարան  գնալու ցանկություն է առաջանում։ Մեզի հետ օրգանիզմից դուրս են գալիս նաև օրգանիզմին և ոսկորներին անհրաժեշտ շատ նյութեր (նույն կալցիումը, մագնիումը, ցինկը  և շատ այլ նյութեր):

Վերջում տեղի է ունենում էներգետիկ վերելք, և երբ արյան մեջ շաքարի մակարդակն ընկնում է, մարդը ապատիա և հոգնածություն է զգում։