California State University-ի մի խումբ գիտնականներ՝ պրոֆեսոր Դեւիդ Վոնգի ղեկավարությամբ, նոր թեստ են մշակում քաղցկեղի արագ ախտորոշման համար։ Այդ թեստը կարելի է անցկացնել տանը 10 րոպեում, եւ անալիզի համար միայն պետք է հիվանդի մեկ կաթիլ թուքը։

Ինչպես պարզաբանում է Դեւիդ Վոնգը, թեստը հայտնաբերում է ուռուցքային ԴՆԹ մասնիկներ, որոնք առկա են օրգանիզմի հեղուկներում։ Այդ մոտեցումը հայտնի է որպես հեղուկ բիոփսիա։ Քաղցկեղի ախտորոշման համար արյան անալիզ այսօր կարելի է անցկացնել միայն բիոփսիա անցկացնելուց հետո։ Միայն այդպես բժիշկները կիմանան, թե ինչպիսի «գենետիկ ստորագրություն»  է պետք փնտրել հիվանդի արյան մեջ։ Այդ պատճառով արյան անալիզը կարելի է անցկացնել քաղցկեղի տարածման կոնկրետ աստիճանը պարզելու համար, սակայն ոչ դրա նախնական ախտորոշման համար։

Սակայն, ինչպես ցույց է տվել պրոֆեսոր Վոնգի աշխատանքը, թքի մեկ կաթիլում բավականաչափ տեղեկություն կա, որպեսզի քաղցկեղն ախտորոշվի դրա ի հայտ գալուց անմիջապես հետո։

Հեղինակները պնդում են, որ նոր թեստը ոչ միայն պարզ է կիրառության մեջ, այլ նաեւ թույլ է տալիս հիվանդությունն ախտորոշել 100 տոկոս ճշգրտությամբ։ Բացի այդ, այն ոչ ինվազիվ է, եւ հետեւաբար դրա անցկացումը պակաս ցավոտ է հիվանդների համար։

Քաղցկեղով հիվանդների շրջանում թեստի փորձարկումները սկսվելու են արդեն այս տարի, իսկ հետագայում այն կօգտագործվի բժշկական պրակտիկայում։ Այն կօգնի հստակ ախտորոշել ոչ  միայն թեթեւ, այլեւ մյուս տեսակների քաղցկեղները։ Բացի այդ,  նոր թեստը հնարավոր կլինի օգտագործել շաքարախտի եւ այլ հիվանդությունների ախտորոշման համար։