նախընտրելի դարձնել
Բրազիլիայում գիտնականների իրականացրած հետազոտությունները ցույց են տվել, որ Զիկա վիրուսի փոխանցող կարող է լինել մոծակների եւս մի տեսակ, որին նախկինում չէին կասկածում հիվանդության փոխանցման մեջ:
Ավելի վաղ համարվում էր, որ հիվանդության հիմնական փոխանցողները Aedes aegypti մոծակներն են:
Oswaldo Cruz կենտրոնի բրազիլացի գիտնականները պնդում են, որ իրենց հաջողվել է լաբորատոր պայմաններում վիրուսը փոխանցել մոծակների մեկ այլ տեսակի` Culex quinquefasciatus-ին: Արյուն ծծող միջատների այս տարատեսակը Բրազիլիայում 20 անգամ ավելի հաճախակի է հանդիպում, քան հազվագյուտ Aedes aegypti մոծակները: Հաղորդվում է, որ վիրուսը հաստատվել է լաբորատոր մոծակների օրգանիզմում այն բանից հետո, երբ միջատները Զիկայով վարակված ճագարների արյուն են համտեսել:
Ինչպես հաղորդում է Reuters-ը, գիտնականները նշում են հետագա հետազոտությունների անհրաժեշտությունը:
Զիկա տենդը կապիկների սուր վարակիչ հիվանդություն է, որը երբեմն մարդուն է փոխանցվում մոծակների միջոցով եւ բնութագրվում է բարորակ ընթացք ունեցող տենդով: Վիրուսն առավել վտանգավոր է հղի կանանց համար, որովհետեւ պտղի մոտ միկրոցեֆալիա է առաջացնում ուղեղի հնարավոր ծանր վնասմամբ:
