Քաղցկեղային բջիջները կարող են տարածվել տարբեր տեսակի ծովային կենդանիների միջեւ, պնդում են Կոլումբիայի համալսարանի Բժշկական կենտրոնի (ԱՄՆ) գիտնականները, որոնք այդ հետաքրքրաշարժ բացահայտումը կատարել են Կանադայից եւ Իսպանիայից գործընկերների հետ: Այդ հայտնագործությունը կարող է օգնել մարդու մոտ ուռուցքային հիվանդությունների առաջացման մեխանիզմների ավելի լավ ընկալմանը:
Հետազոտություններն անցկացվել են օվկիանոսի խորքի բնակիչների տարբեր տեսակների վրա, որոնց հավաքել էին Կանադայի եւ Իսպանիայի ափերից: Նրանցից երեքի մոտ ուռուցքներ են հայտնաբերել, որոնք ի սկզբանե առաջացել էին այլ առանձնյակների օրգանիզմում: Իսկ նրանցից մեկին կարելի է միջտեսակային փոխանցման օրինակ համարել, ինչը նախկինում քիչ հավանական էր թվում. Polititapes aureus կակղամորթների քաղցկեղային բջիջները գենետիկորեն համապատասխանում էին կակղամորթների այլ տեսակի` Venerupis corrugate-ի բջիջներին:
«Այդ ամենն այն մասին է վկայում, որ ուռուցքները նոր ֆենոտիպեր ձեռք բերելու զարմանալի կարողություն ունեն, ինչը մեծացնում է նրանց կենսունակությունը եւ տարածվածությունը,-ասել է հետազոտության հեղինակներից մեկը` Կոլումբիայի համալսարանի պրոֆեսոր Սթիվեն Գոֆֆը: Օվկիանոսն իրենից ներկայացնում է տարբեր մանրէների հսկայական կուտակում, իսկ այժմ նաեւ` քաղցկեղային բջիջների, որոնք կարող են հիվանդություն առաջացնել: Բայց առայժմ կակղամորթների պատճառով ծովում լողալուց հրաժարվելու հարց չկա: Առայժմ չկան ապացույցներ, որ ուռուցքները տարածվում են կենդանիների այլ տեսակների վրա»:
Չնայած չարորակ բջիջներով վարակման ուղիներն անհստակ են մնում, երկփեղկանի կակղամորթների նստակյաց կենսակերպը թույլ է տալիս ենթադրել, որ հիվանդության փոխանցիչ կարող է լինել ծովային ջուրը, որը ֆիլտրվում է կենդանիների մարսողական եւ շնչառական համակարգերով:
Այդ հետազոտության մասին հաղորդում է Nature ամսագիրը:
Նշենք, որ մարդկային քաղցկեղն առայժմ վարակիչ չի համարվում, եթե չհաշվենք իհարկե այն դեպքերը, երբ քաղցկեղը զարգանում է մարդու պապիլլոմայի վիրուսից:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր