Խաղալիքներով եւ այլ երեխաների հետ խաղերը նպաստում են երեխայի սոցիալիզացիային. երեխան այդ խաղերի միջոցով սովորում է շփվել, տարբեր դերեր է փորձում, ճանաչում է շրջապատող աշխարհը, եւ այդ ամենը նրան նախապատրաստում է ժամանակակից աշխարհում ապրելուն: Համակարգչային խաղերը, ընդհակառակը, բարդացնում են նրա ադապտացիան հասուն կյանքին: Ինչո՞ւ են որոշ երեխաներ այդքան կապվում խաղերին եւ արդյոք դա վտանգավոր է: Այդ հարցերը պարզելուն օգնել է հոգեբան Արմինե Փաշայանը:
Հոգեբանի խոսքով, անընդհատ համակարգչային խաղեր խաղացող եւ հասակակիցների հետ քիչ շփվող երեխաների մոտ իրոք էլ սոցիալիզացիայի հետ կապված խնդիրներ են առաջ գալիս: Երբ նրանք ստիպված են լինում շփվել իսկական մարդկանց հետ, նրանք չգիտեն, թե իրենց ինչպես պահեն նրանց հետ: Այդ իմաստով համակարգչային խաղերն այնքան էլ օգտակար չեն. դրանք երեխային խանգարում են ճանաչել իսկական աշխարհը:
Ճիշտ է, զարգացնող խաղերը, եթե երեխան քիչ է խաղում դրանք եւ չի կտրվում մնացած բոլոր զբաղմունքներից, կարող են նույնիսկ օգտակար լինել նրա համար: Երբեմն նույնիսկ «կրակոցախաղերը» կարող են օգտակար լինել. եթե երեխան չարացած է, կարող է 15-20 րոպե խաղալով դուրս թափել իր ագրեսիան` հրեշների կրակելով, իսկ հետո արդեն հանգիստ զբաղվել իր գործերով: Բայց հոգեբանը խորհուրդ չի տալիս երկար խաղալ նման խաղեր:
Իսկ ինչո՞ւ են որոշ երեխաներ այդքան ձգտում համակարգչային խաղերի:
Մասնագետի խոսքով, որոշ երեխաների համար համակարգչային խաղերը միջոց են` խուսափելու իրականությունից, որում իրենց «անհարմարավետ է»: Գուցե նրանց կյանքում կա ինչ-որ բան, որը նրանց դուրս չի գալիս: Շատ երեխաների ամենատարածված խնդիրներից մեկը ծնողական վերահսկողությունն է: Եթե չափահասներն ամեն ինչ որոշում են երեխայի փոխարեն, պլանավորում են նրա օրվա ամեն րոպեն եւ նրան ազատ ժամանակ չեն թողնում, երբ նա ինքը կարող է որոշել, թե ինչով զբաղվի, երեխան ամենայն հավանականությամբ, նույնիսկ չգիտակցելով դա, իրեն ճնշված է զգում: Այդ դեպքում համակարգչային խաղերը սկսում են էլ ավելի գրավել նրան, չէ որ միայն այդ ժամանակ է ազատության եւ վերահսկողության բացակայության պատրանք առաջանում:
Հոգեբանի խոսքով, շատ ծնողներ մտածում են, որ երեխան ազատ ժամանակ չպետք է ունենա, բայց դա ճիշտ չէ. երեխան պետք է հնարավորություն ունենա ինքը որոշելու, այդ թվում, թե ինչպես անցկացնի ազատ ժամանակը:
Եթե ծնողները չեն ուզում, որ երեխան շատ խաղա համակարգչային խաղեր, չպետք է արգելեն, այլ երեխային իր համար հետաքրքիր այլընտրանքներ առաջարկեն. ընդ որում, այլընտրանքները մի քանիսը պետք է լինեն, այդպես երեխան այնպիսի զգացողություն կունենա, որ ինքը կարող է որոշել, թե ինչով զբաղվի, եւ դա նրան ոչ միայն կօգնի շեղվել համակարգչից, այլեւ կօգնի հաղթահարել այն զգացողությունը, որը համակարգչին նրա հակման գլխավոր պատճառն է դառնում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր