Օքսֆորդի համալսարանի (Oxford University) եւ Լոնդոնի համալսարանական քոլեջի (University College London) գիտնականները ճանաչել են ուղեղի այն հատվածը, որը մարդկանց օգնում է սովորել, թե ինչ է պետք անել, որ ուրիշների համար լավ լինի: Այդ բացահայտումը կարող է օգնել հասկանալ, թե ինչ է տեղի ունենում այնպիսի վիճակներում, ինչպիսին հոգեգարությունն է, որի ժամանակ մարդիկ ծայրաստիճան հակասոցիալական պահվածք են դրսեւորում:
Գիտնականների խումբը գլխավորել է Պատրիսիա Լոկվուդը (Dr Patricia Lockwood), որը պարզաբանել է, որ պրոսոցիալական պահվածքը, երբ մարդիկ ջանում են ուրիշներին օգուտ տալ, մարդկային փոխհարաբերությունների հիմնարար ասպեկտ է եւ անհրաժեշտ է այն բանի համար, որ հասարակությունը համերաշխ լինի, բայց մինչ այժմ հայտնի չէ, թե ինչպես եւ ինչու են մարդիկ ինչ-որ բան անում ուրիշների համար: Չնայած մարդիկ սովորաբար հակված են սոցիալամետ պահվածքի, մեծ տարբերություն կա նրա մեջ, թե այդ պահվածքը որքանով ուժգնորեն է դրսեւորվում կոնկրետ անհատից կախված:
Կամավորներին առաջարկել են նայել որոշակի խորհրդանիշների եւ մտածել, թե դրանցից որոնք կարող են առավելագույն օգուտ բերել իրենց կամ ուրիշ մեկին: Մարդիկ այդ որոշումները կայացրել են` զուգահեռաբար մագնիսառեզոնանսային տոմոգրաֆիա անցնելով: Պարզվել է, որ նախ` մարդիկ անհամեմատ ավելի արագ են հասկանում, թե ինչպես կարող են իրենք օգուտ քաղել, քան` ինչպես որեւէ օգտակար բան անել ուրիշների համար: Երկրորդ` բոլոր դեպքերում, երբ հետազոտության մասնակիցները մտածել են այլ մարդկանց մասին, ակտիվացել է ուղեղի խստորեն որոշակի հատված` դիմային գոտիական կեղեւը: Այդպիսով` հետազոտողների խոսքով, հենց այդ հատվածն է պատասխանատվություն կրում պրոսոցիալական պահվածքի համար:
Նախագծի ղեկավարը նաեւ հավելել է, որ ուղեղի այդ հատվածը մարդկանց մոտ տարբեր ինտենսիվությամբ է աշխատել եւ այն կամավորները, որոնք հաղորդել են, որ իրենք էմպատիայի բարձր մակարդակ ունեն, ավելի բարձր արդյունքներ են ցուցադրել, քան մյուսները: Այդ գործընթացների ընկալումը, նշել է Պատրիսիա Լոկվուդը, հնարավորություն կտա պարզել, թե ճշգրիտ ինչն է սխալ գնում հոգեկան խանգարումներով տառապող մարդկանց ուղեղում, որոնք բնորոշվում են շրջապատի հանդեպ արհամարհական վերաբերմունքով:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր