Շվեդիայում պատրաստվում են մարդկային սաղմերի գենոմների խմբագրում սկսել: Այդ մասին հաղորդած` Karolinska Institute-ի հետազոտող Ֆրեդրիկ Լաններն արդեն CRISPR համակարգի օգնությամբ սաղմերի գենոմի մոդիֆիկացիայի փորձարկումներ է կատարում: Նա ցանկանում է պարզել, թե ինչ գեներ են մասնակցում սաղմնային զարգացման գործընթացին եւ ինչի հետ են կապված վիժումները եւ անպտղությունը:
Լաններն արդեն պատրաստվում է նոր տվյալներ ստանալ սաղմնային ցողունային բջիջների մասին եւ հասկանալ որոշ հիվանդությունների, օրինակ` Պարկինսոնի հիվանդության, կուրության որոշ տեսակների եւ այլ խանգարումների բուժման գործում դրանց դերը:
Սաղմերի գենոմների խմբագրման փորձարկումներ արդեն իրականացվել են չինացի գիտնականների կողմից` 2015 թվականին, ճիշտ է, ստիպված են եղել դրանք ընդհատել, որովհետեւ դրանք այնքան էլ հաջող չեն ընթացել: Այս տարվա փետրվարին Մեծ Բրիտանիայից գիտնականների խումբը նման խմբագրման թույլտվություն է ստացել. կարեւոր պայման է եղել այն, որ մոդիֆիկացված սաղմերը պետք է ավերվեին փոփոխությունների առաջացումից մեկ շաբաթ անց: Լանները պատմել է, որ ինքը նախատեսել է փորձարկումներ իրականացնել յոթօրական սաղմերի վրա եւ չի պատրաստվում դրանք 14 օրից երկար աճեցնել:
Մի շարք հետազոտողներ եւ հանրության շատ ներկայացուցիչներ նման փորձարկումները ռիսկային եւ ոչ էթիկական են համարում. կարծիք է տարածվել, որ տեխնոլոգիան կօգտագործվի «դիզայներական» երեխաների ստեղծման համար: Իսկ Լանները կարծում է, որ սաղմնային գենոմի խմբագրում պետք է թույլատրվի սոսկ հիմնարար հետազոտություններում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր